Lectura Rumantscha

Oz faschain nus teater, giain en la Caribica, e guardain sin pleds. Buna lectura!

Sagogn e Mustér sin tribuna

Tge rolla da teater giess il meglier a prà cun tai? Èsi l’erox, il nausch, il clown – u fissas il pli gugent mo il statist/la statista? L’auter onn dastgas ti ta legrar da «mo» esser l’aspectatur. A Sagogn ed a Mustér preparan las uniuns da teater gia ussa lur inscenaziuns. En omaduas vischnancas sursilvanas èsi planisà dad eriger tribunas en il liber.

26°C e palmas

Sas ti nua che Barbados è? Jau hai stuì googlar! Jau saveva schon ch’igl è ina insla x-insanua or en l’Atlantic, ma nua exact, betg idea. Wikipedia m’ha lura dà pled e fatg: Igl è in’insla en la Caribica, la temperatura media è 26°C e circa 280 000 persunas vivan là. E – tranter tut questa glieud – sa chatta era ina Rumantscha, numnadamain la magistra da linguas Jennifer Scantlebury. En la columna raquinta ella dapli da sia vita sin l’insla paradisica.

In nov «fascichel»

Jau chat adina interessant, co ch’il diever da pleds rumantschs sa mida cun il temp. E ti? Per fortuna s’occupa er ina gruppa da scienziadas e scienziads da lingua cun quests fenomens. Gist avant paucs dis ha la squadra dal Dicziunari Rumantsch Grischun da Cuira prendì or dal furn ses pli nov «fascichel». En quel vegns ti a savair dapli per exempel da l’istorgia e dal diever dal pled «moler» ch’ins numna ozendi plitost il «pictur».

A revair e bun divertiment cun la Lectura Rumantscha!