Bus enstagl trens
Las proximas jamnas sto la Viafier Matterhorn Gottard serrar entgins tschancuns da sia reit, denter auter denter Realp e Mustér. Enstagl da trens curseschan bus.
Sco quei che la Viafier Matterhorn Gottard scriva en ina communicaziun als mieds da massa, vegn il tschancun dalla viafier denter Visp e Täsch serraus dils 13 d’october entochen ils 10 da november 2025. Pervia da lavurs ch’ein da far sto era il tschancun denter Realp e Mustér vegnir serraus dils 20 entochen ils 25 d’october 2025. Enstagl da trens garanteschan bus las colligiaziuns tenor urari. «Tonaton duessen ils viagionts quintar cun dapli temps da viadi», scriva la Viafier Matterhorn Gottard.
Temps cun pauc traffic
La Viafier Matterhorn Gottard nezegia igl atun per exequir pli grondas lavurs vid sia reit. Quei temps hagi dameins traffic. «Las interpresas san luvrar en pliras squadras. L’efficienza e qualitad dalla lavur ei megliera. Ultra da quei ston las maschinas ed il material buca vegnir transportai mintga di danovamein sil plazzal», scriva l’interpresa. Medemamein sappien las immissiuns vegnir concentradas sil di. Senza serrar ils tschancuns dessi ei dapli canera la notg e quei sur pli liung temps.
Gronds plazzals
Il tschancun ella part su dalla Surselva dalla Viafier Matterhorn Gottard ei pertuccaus quest atun dalla nova cruschada a Bugnei/Tscheppa en Val Tujetsch. Sco la viafier scriva, vegn quella cruschada nova messa en funcziun. Che la lingia ei serrada da Realp entochen Mustér ha denton aunc in auter motiv. Ad Andermatt vegn il niev indrez da regulaziun mess en funcziun.
Sil tschancun da Visp a Täsch vegn realisau plirs projects. El Mattertal vegn construiu in sutpassadi ella Josikurve a S. Niklaus. Plinavon succeda la sanaziun dalla punt sul Mühlebach sco era la renovaziun cumpleina a Randa-Täsch e la renovaziun dil trassé a Schali-Täsch.
Gust da leger dapli?