Impurtont pass ella midada d’energia

Avon biebein quater meins han las lavurs da baghegiar l’ovra da fotovoltaica Sedrun Solar entschiet. El territori dil Cuolm Val e Scharinas sur Selva e Tschamut vegn construiu in implont da fotovoltaica per 87 milliuns francs che furnescha igl avegnir energia per 6500 casadas. Suenter la finiziun dallas lavurs da baghegiar vegn ella a producir rodund 29 gigawatt-uras, da quei 47 % il miez onn d’unviern. Sco Sedrun Solar scriva en ina communicaziun als mieds da massa ei 15 % dall’ovra construida, vul dir 850 da totalmein 5700 meisas cun panels da fotovoltaica. Las lavurs ein s’avanzadas aschia che l’emprema energia sa vegnir furnida ella reit. Solar Sedrun ei ina societad acziunara che s’auda mintgamai per la mesadad all’Energia alpina ed Aventron. L’ovra sesanfla sin in’altezia da 1950 entochen 2145 m s.m.

Emprema kilowatt-ura

«Igl ei aschilunsch: Sedrun Solar – la pli gronda ovra da fotovoltaica alpina dalla Svizra – furnescha l’emprema kilowatt-ura current ella reit», scriva Sedrun Solar en ina communicaziun als mieds da massa. El rom d’in act festiv vegn quei tierm simbolic commemoraus mesjamna, ils 22 d’october 2025 el territori dall’ovra a Cuolm Val e Scharinas. «Cheutras contonschin nus in impurtont tierm tecnic e dein in ferm accent alla midada dalla producziun d’energia en Svizra», puntuescha Sedrun Solar. Ch’igl ei resussiu da contonscher la finamira da furnir emprema energia electrica ella reit quest atun attribuescha l’interpresa a differents facturs: «Pusseivel ei quei grazia alla collaboraziun optimala cullas interpresas da baghegiar, las autoritads cantunalas e communalas sco era la populaziun da Tujetsch.»

Cun pendiculara e helicopter

Avon biebein in onn han las preparativas pil plazzal a Cuolm Val–Scharinas entschiet. Entochen che las lavurs da construcziun dallas meisas cun panels da fotovoltaica han entschiet questa primavera, ha ei gi num construir igl access ed ina pendiculara da transport. Cun quella pendiculara da Prau Mulin sut Tschamut entochen sil Cuolm da Val vegn tut il material transportaus sil plazzal, denter auter las meisas cun fotovoltaica ella dimensiun da mintgamai 2,4 sin 7,5 meters. Naven dil plaz d’installaziun sil Cuolm Val vegnan ils elements d’itschal e da fotovoltaica allura reparti sil plazzal cun agid da helicopter. Aschia stattan las immissiuns da canera ella val en rama. Tut en tut vegnan rodund 12 000 tonnas itschal menadas culla pendiculara el territori dall’ovra. La pendiculara ei 2,4 km liunga. La partenza simbolica per las lavurs da baghegiar da quei project ei succedida miez zercladur cun ina fiasta a Sedrun.