Lectura Rumantscha

Mintga trenadra e mintga trenader da ballape sa: In bun banc da reserva vala bler. Las quatter istorgias dad oz spetgan era mo sin ch’ellas vegnan legidas da tai, chara lectura e char lectur.

Giessas ti tar il FC Bayern?

Jau na giess, mai! Ma per mai n’avessi era mai e pli mai tanschì, gnanc sin il banc da reserva. Enfin ussa han ils gronds stars dal club da ballape FC Bayern num Manuel Neuer e Harry Kane, ma forsa fa prest ina giada insatgi da Zuoz in sigl tar il club bavarais. Il club collavurescha cun il Lyceum alpinum. Trenaders da num e pum vegnan tranteren a Zuoz per trenar ils scolars e las scolaras. E cuntrari pon ils scolars e las scolaras visitar la chapitala da la Baviera.

Cummissari sin dumonda

Ueli Caduff e Duri Blumenthal – ils dus umens lumnezians èn ussa era sesids in mumenet sin il banc da reserva, suenter ch’els eran atgnamain sa retratgs da la politica locala. Ussa ston els dentant puspè siglir en, cunquai che gist duas vischnancas sursilvanas èn en pitgiras e na chattan betg suprastantas e suprastants. E perquai ha il chantun nominà ils dus «cumissaris» per impedir ch’i dettia ina bloccada politica totala.

Ina copia che allegra

Original è e resta original, vi da quai na sas ti betg midar bler: er ina buna copia dad in «Van Gogh» resta ina copia. Ma tranteren po er ina copia legrar, u betg? Almain a Lumbrein è quai anc uschia. La «Stela da Sietschen» è turnada en ses lieu d’origin. Cunquai che l’original è fitg custaivel e sto vegnir conservà en las paraids segiras dal museum, ha la Pro Lumerins decidì da laschar far ina bella copia cun las gravuras misteriusas d’avant passa 4000 onns.

La «IA» fatschenta

Sa tschentain nus tuts prest sin il banc da reserva? Tge pensums surprenda la Intelligenza Artifiziala (IA) – e tgenins betg? Ditg sincer: Sche questa «intelligenza» lavass il resti per mai e pendess era si quel, lura fiss jau immediat intgantà. Ma sch’ella surprendess mes job, lura avess jau in pli grond problem.

Tge ch’è cler: La IA vegn a transfurmar il mund da lavur. En tge furma, quai avain nus dumandà trais persunas che sa fatschentan tranter auter cun da questas dumondas. Els raquintan da lur experientschas enfin ussa.

A revair e bun divertiment cun la Lectura Rumantscha!