Lectura Rumantscha

Ti legias questas lingias, damai t’interesseschan discussiuns, opiniuns ed ideas. Quai emprova il schurnalissem (local) gea da furnir di per di. Quai è er oz il cas!

Cler sco il sulegl sin il Vorab

Forsa has era ti discutà en tes ravugl davart il «deal» da las pendicularas giudim la Surselva. Tar nus en redacziun da la FMR ha la vendita da l’infrastructura da la Arena Alva SA a la Finanz Infra SA (cun participaziun da las vischnancas Flem, Laax, Falera) dà bravamain da discutar. Intgins redacturs avessan vulì dapli discussiun publica (e mediala), ad autras collegas pareva quai main impurtant, perquai che tut era apparentamain cler. Uss è il resultat uschè cler sco il sulegl sin il Vorab, cun las votaziuns communalas da la fin d’emna.

Da vender: patins

Igl è en mintga cas stà ina bun’idea da realisar en il guaud tranter Alvagni Bogn e Surava la «Skateline Alvra», in vial da glatsch da 3 km. Jau hai deplorablamain manchentà ils davos onns da trair en ils patins e da far ina giada quel traject. Uss èsi memia tard. Dapi tschintg onns è «la pli lunga patinera da la Svizra» serrada ed ultimamain ha la societad purtadra decis da liquidar l’uniun e da vender l’inventari, tranter auter var 300 patins. Sche ti duvrassas damai anc patins per quest enviern, lura t’annunzia en Val Alvra.

Avert per ina terza stafla?

Forsa ta regordas anc da las discussiuns che l’emprima stafla da «L’ultim Rumantsch» ha provocà? Cura che quella era vegnida emessa il 2024 avevi bain dà bler laud, ma er inqual vusch critica. En duas emnas cumpara la segunda stafla da «L’ultim Rumantsch», la quala taissa vinavant l’istorgia da la famiglia Durisch e da sia gasetta. Datti forsa perfin ina terza stafla? – Il reschissur Adrian Perez fiss en mintga cas avert per ina cuntinuaziun.

E sche ti fissas avert/a per anc discutar vinavant ina u l’autra idea, lura fa sco nossa columnista dad oz: Va a la maisa radunda per «ina gronda sperta»!