Tabla da Schlans ei ida «se (d)Trun»

«La vischnaunca ha priu enconuschientscha dil cass entras las medias socialas. Nus savein rir da cor da quella sgnocca», rispunda la vischnaunca da Tujetsch alla FMR sefundond silla cattavegna ch’ei schabegiada la notg da sonda sin dumengia. Cu la giuventetgna va en sortida, ni sch’igl ei zanua ina disco cun bia glieud giuvna, ston ins quintar che quei hagi consequenzas e che utschals dalla notg fetschien ina ni l’autra.

Nova H19 a Schlans

La fin d’jamna vargada ei ina tala bagatella schabegiada ella Cadi. «Montar e demontar tablas e signals da traffic ei caussa digl Uffeci da construcziun bassa», rispunda la Polizia cantunala sereferond sil cass dalla fin d’jamna a Schlans e Sedrun. Nunenconuschents han midau ora las tablas d’entradas dils vitgs. Schlans senumnava dumengia endamaun Sedrun. La «nova» tabla da colur blaua a Schlans ha rendiu attent ch’ins carreschi tuttenina sin in stradun cantunal tras Schlans. Ed a Sedrun era il stradun digl Alpsu H19 a Sedrun tuttenina degradaus, culla tabla alva da Schlans, ad ina via communala.

Tgei manegia la vischnaunca da Trun dall’acziun ch’ils utschals dalla notg han fatg sin siu territori? Il president communal, Dumeni Tomaschett, declara alla FMR, cun in tschegn ed in surrir stendiu: «Nus essan aviarts per novas fusiuns!». La tabla da Schlans, montada a Sedrun, ed il giug da plaids «Se D(T)run», savessen esser segns d’ina avischinaziun dallas duas vischnauncas. 

Negin donn, negina denunzia

Per fermar las tablas els loghens «novs» han ils utschals dalla notg duvrau ligiacabels robusts da plastic. Els han luvrau professiunalmein, han denton levgiau agl uffeci da construcziun bassa la remontascha. La damonda dalla FMR alla polizia cantunala schebein ella stoppi s’occupar meinsvart el Grischun cun tals e semeglionts cass, rispunda il post da medias: «Na, igl ei excepziuns ed il davos temps havein nus buca observau tals cass.» Ils utschals dalla notg ston lu era buca quintar cun ina denunzia per lur acziun «comessa» probablamein cun turnar dalla sortida. «Demai ch’ei ha dau negins donns, motivescha la polizia sin damonda dalla FMR. Sch’ei detti avis suenter in tal schabetg vegni la polizia tuttina a far investigaziuns, renda la Polizia cantunala attent. Sch’ils da Schlans ein sesenti l’entira dumengia sco sch’els fussen «se D(T)run» ha la FMR buca eruiu. Perinagadaa ha gl’Uffeci da construcziun bassa remontau gliendisdis endamaun las tablas els loghens oriunds.