«Igl Ucliva ei staus in siemi per mei»

«Haveis udiu, l’Ursula cala sco hoteliera digl Ucliva.» – Quella frasa ha fatg la runda las davosas jamnas a Vuorz ed Andiast. Suenter nov onns a Vuorz ei Ursula Wilhelm, che deriva dall’Austria, sedecidida da turnar en sia patria e da surprender leu in menaschi da gastro e cultura. «Quella midada ei vegnida nunspitgadamein era per mei», di Ursula Wilhelm che ha – avon che vegnir a Vuorz igl onn 2017 – luvrau ella hotellaria a Lai ed en l’Engiadin’Aulta. «Jeu sun ussa s’interessada per in menaschi da gastronomia e cultura pli pign a Mörbisch am Neusiedlersee el Burgenland. Quei ha funcziunau pli spert che quei ch’jeu hai tertgau.» Ella hagi las larmas els egls ils davos dis, cura che hosps ed indigens deploreschien ch’ella mondi. «Ils cumpliments legran mei. Jeu havess mai tertgau ch’jeu vegni appreziada aschi fetg cheu ella regiun.»

Pli datier dalla famiglia

«Il motiv ch’jeu lessel turnar a casa ei mia famiglia», di la hoteliera Ursula Wilhelm. «Jeu hai sentiu adina pli fetg il basegns da puspei esser pli datier da mia famiglia che viva ella vischinonza da Vienna. Plinavon hai jeu giu uonn 58 onns e sai nunpusseivel cuntinuar miu mistregn culla medema intensitad sco ils davos onns.»

La lavur egl Ucliva seigi pretensiusa, raquenta la hoteliera partenta. Ella seigi heftia ed intensiva. Probablamein vegnessi ella buca da satisfar ditg pli a quei ritmus da lavur. Ursula Wilhelm: «Menar igl Ucliva ei in job da 200 %. Sco hoteliera independenta ed affittadra eis ei da purtar l’entira responsabladad, mintga di ed igl entir onn.» Quella structura hagi ella vuliu rumper ussa cun tschercar in’incumbensa ch’ella damogni ils proxims diesch onns.

Negina «one-woman-show»

Malgrad il grond pensum da lavur da hoteliera hagi ella adina mirau d’anflar temps e peda per siu team, di Ursula Wilhelm en discuors cun la FMR. «Jeu sun negina ‹one-women-show›. Senza mias collaboraturas e mes collaboraturs che han gidau da purtar il messadi e viviu ensemen cun mei la filosofia digl Ucliva, fuss il menaschi buca leu nua ch’el ei oz.» Ils davos onns hagi ella adina puspei udiu da hosps che hagien getg ch’ins vesi vid il persunal, ch’ellas ed els lavurien bugen egl Ucliva. «Quei ei in dils pli bials cumpliments. Pertgei ins emblida savens che collaboraturas e collaboraturs cuntents ein ils prezius multiplicaturs.»

Cultura Vuorz va vinavon

Cun l’uniun Cultura Vuorz ha Ursula Wilhelm per l’emprema gada en sia veta giu peda da s’occupar pli el detagl d’occurrenzas culturalas e da cumbinar la gastronomia cun la cultura. «Jeu sun carschida si a Vienna ch’ei ina metropola dalla cultura. Ed jeu seregordel che jeu separticipavel gia cun 16 onns a prelecziuns litteraras els cafés da Vienna. Pli tard, en la branscha da hotel en l’Engiadina ed a Lai, hai jeu giu memia pauc temps. E cheu a Vuorz hai jeu saviu realisar ensemen cun amitgas ed amitgs l’uniun Cultura Vuorz.» Cultura Vuorz stetti suenter otg onns sin bunas combas. Las activitads vegnien a cuntinuar, era suenter ch’ella seigi buca pli a Vuorz.

Separticipar dil vitg

Cugl 1. da mars 2026 daventa la hoteliera Dorothée Rössinger nova affittadra dil Hotel Ucliva e cunquei successura dad Ursula Wilhelm. Per lezza ei quei la megliera cuntinuaziun ch’ei sa dar. «Igl Ucliva survegn ussa ina specialista cun in’excellenta scolaziun sil sectur dalla gastronomia, ina dunna che ha gia rimnau experientschas sils differents secturs dalla hotelleria, ed ina persunalitad che porta vinavon la filosofia dall’Ucliva.»

La hoteliera partenta e la nova vegnan a passentar ina part dalla sessiun d’unviern ensemen. Ursula Wilhelm di ch’ella sappi sulettamein dar vinavon a sia successura las bunas experientschas ch’ella hagi fatg. «Sesentir sco part dil vitg, cultivar il contact cul vitg da Vuorz ed appreziar las collaboraturas ed ils collaboraturs. Quei ein treis experientschas che han purtau mei ils davos nov onns.»

Nov onns genials

«Il Hotel Ucliva ei staus in siemi per mei», di Ursula Wilhelm ella retrospectiva. «Quei tuna ussa forsa empau patetic, mo igl ei aschia.» Ella hagi giu maun liber da realisar sias ideas, quei per exempel era cun las occurrenzas da cultura en cumbinaziun cun la culinarica. «Jeu sun vegnida beneventada igl onn 2017 cun bratscha aviarta d’ina nova suprastonza, dalla commembranza dalla corporaziun Ucliva e dalla glieud da Vuorz. Igl Ucliva ha anflau mei e jeu hai anflau igl Ucliva.»

Ella retrospectiva di la hoteliera ch’ils onns a Vuorz seigien stai ina caussa dil cor per ella. «Jeu hai anson discurriu da larmas. Larmas vegn ei segir aunc a dar zacontas, cura ch’jeu dun lu adia per propi.»