Ün cler sustegn per la «lex Paradies»

A la fin d’eira üna roba clera e netta: Cun 60 vuschs SCHI cunter duos vuschs NA ha la radunanza cumünala da Scuol decis in lündeschdi saira a favur d’üna revisiun parziala da la planisaziun locala da Ftan. Quella es necessaria per fabrichar sülla parcella da l’Hotel Paradies serrà ün nouv resort cun hotel, abitaziuns da vacanzas gestiunadas, seguondas abitaziuns e chasa da persunal.

Raduond ün mais e mez davo cha’l proget d’eira gnü preschantà publicamaing ad üna sairada d’infuormaziun a Ftan d’eira la votaziun in sala cumünala a Scuol la prüma decisiun dal pövel in quista chosa – intant però pür üna consultativa per mans da la votumaziun a l’urna dals 30 november 2025. Quella jada vegna lura decis definitivamaing.

Üna decisiun per proseguir cul proget

Sco cha’l capo cumünal ha accentuà plüssas jadas dürant la radunanza cumünala giaja pel mumaint per quai dad insomma pussibiltar cha’l proget gnia prosegui e concretisà i’ls prossems mais. «Nus nu trattain uossa üna dumonda da fabrica», ha dit Aita Zanetti. «Nus s-chaffin la pussibiltà da sviluppar ün lö chi d’eira i’ls ultims ons serrà.»

Cun sia Paradies Resort SA, chi posseda la parcella da l’hotel dadour Ftan, voul il president Horst Rahe sbodar l’edifizi existent da l’Hotel Paradies. Be la chasa Beyer, fabrichada al principi dal 20avel tschientiner, restess mantgnüda da l’infrastructura existenta. Sur terra esa invezza previs da fabrichar nouv chasas chi fuorman lura üna sort cumünet e dan tet ad ün hotel tradiziunal, ad abitaziuns da vacanzas gestiunadas, a seguondas abitaziuns ed a stanzas da persunal. Suot terra es previs ün restorant public, üna sporta da spa ed üna garascha.

Tenor il plan d’ütilisaziun cha’l possessur ha s-chaffi per mans dal cumün cumpigliess tuot il resort 218 lets: 34 in l’hotel, 148 illas abitaziuns gestiunadas e 36 illas seguondas abitaziuns. Previs füss tenor quel plan ün manaschi dürant tuot l’on chi dess lavur a var 40 impiegadas ed impiegats. E sco cha’ls fradgliuns Gian ed Andrea Fanzun, chi han sviluppà cun lur büro d’architectura il proget, vaivan dit fingià a la sairada d’infuormaziun, vegna calculà cun investiziuns da 40 fin 60 milliuns francs.

Üna nouva «lex Paradies»

«Sco cumün chi ha pers i’ls ultims ons fich blers lets chods, salüdaina intenziuns da s-chaffir da nouv lets chods», ha Aita Zanetti resümà la posiziun dal cumün. Ma per s-chaffir quels i’l möd previs, faja dabsögn d’üna revisiun parziala da la planisaziun da Ftan e da la ledscha da fabrica da la fracziun. Quella nouva «lex Paradies» antecipescha per quist proget specific insè quai cha’l cumün voul pussibiltar ünsacura in tuottas zonas d’hotel culla revisiun totala da la planisaziun: ün’ütilisaziun plü vasta sper la sporta d’hotel tradiziunala, uschea apunta eir üna cun abitaziuns gestiunadas e seguondas abitaziuns per güdar a finanziar il proget.

Il nouv paragraf 28 illa ledscha da fabrica da Ftan cuntegna 15 alineas (in congual cun duos i’l paragraf actual) e definischa las cundiziuns per realisar il «Paradies Resort»: Da prescripziuns architectonicas e che sort da bos-cha chi po gnir plantada sün l’areal surfabrichà fin ad üna cundiziun temporala: Il patrun da fabrica es oblià da cumanzar infra trais ons davo cha la revisiun es ida in vigur cullas lavurs da fabrica, uschigliö scrouda il plan d’ütilisaziun ed il proget es maculatura.

Paca opposiziun, grond sustegn

Sco cha’l capo ha comunichà a la radunanza cumünala sajan dürant la procedura da partecipaziun entradas duos objecziuns cunter la revisiun parziala, la suprastanza haja però refüsà in sia sezzüda dals 13 october tuottas duos.

Üna da quellas objecziuns ha fat üna persuna sainza domicil a Scuol chi posseda daspö plüs decennis üna seguonda abitaziun a Ftan. Quella persuna avertischa dal privel d’ün «overturism» eir a reguard dad ün seguond proget d’hotel annunzchà d’incuort, a quel previs sün l’areal da l’anteriur «Engadinerhof» a Scuol. Implü s’oppuona quella persuna eir cunter l’intenziun da fabrichar i’l «Paradies Resort» seguondas abitaziuns, perquai cha la quota da seguondas abitaziuns saja uossa fingià massa ota e perquai cha quellas chaschunessan amo daplü trafic tras cumün.

Ma evidaintamaing nun han quels argumaints persvas la suprastanza cumünala. Ed eir in sala cumünala es dürant la radunanza gnüda articulada be paca critica vi dal proget. Quai s’ha illa votumaziun lura eir muossà cun ün sustegn da raduond 97% per la revisiun – ün cler messagi in vista a la votumaziun a l’urna dals 30 november. Schi resulta eir quella jada ün SCHI, douvra amo il consentimaint da la regenza grischuna avant co chi po gnir inoltrada üna dumonda da fabrica concreta pel «Paradies Resort».