Lectura Rumantscha

Tgi che legia, quel tegna alerta la testa! Quai n’è betg mo ina sabientscha veglia, mabain er in dals resultats dal pli nov rapport annual da la qualitad da medias 2025. Il rapport è vegnì publitgà quest’emna. Has legì da quel? – En mintga cas datti da leger oz istorgias paradisicas per tegnair alerta la testa:

Il paradis sur Ftan

L’impressari Horst Rahe vuless transfurmar l’anteriur Hotel Paradies a Ftan en in nov paradis turistic. Gia avant in mais e mez eran vegnids preschentads ils plans e las ideas per in resort: in cumplex da nov edifizis cun restorant, abitaziuns, hotel e localitads da wellness. Custs: 40 – 60 milliuns. Però il nov «paradis» dovra l’emprim la piculezza plitost cumplitgada dad ina revisiun parziala da planisaziun locala. Glindesdi è la porta dal paradis ida averta in zichel a Ftan, senza grondas discussiuns.

La caplutta tranter paradis e terra

Sche ti passas sur il Pass dal Lucmagn, lura vesas ella vidvart il Rein da Medel: la chaplutta Son Gagl. Igl è ina pitschna perla istoric-culturala. Probabel ha l’edifizi – silmain intginas parts da quel – bainprest 1000 onns. Da valur è tranter auter il fresco a l’intern. Tenor las pli novas analisas, paress il stadi da chaplutta e fresco dad esser en urden – betg paradisic, ma okay.

Il paradis da Vuorz

L’hoteliera Ursula Wil­helm banduna il mars 2026 ses Hotel Ucliva a Vuorz e turna en sia patria, en Austria. Ella banduna damai suenter nov onns da gestiun ses Ucliva, schegea che vitg ed hotel eran per ella in mez paradis. «Il Hotel Ucliva ei staus in siemi per mei», ha ella ditg a noss collega da redacziun Martin Gabriel. Quel è sa chapescha creschì si a Vuorz ed ha laschà valair gugent quella constataziun.