Igl Hotel Danilo è definitivamaintg istorgia

La premaveira 2025 ò Oliver Bühler, igl proprietari digl Hotel Danilo a Savognin (varda er box), vandia la tgesa da tradiziun a Luzi Thomann e Beat Hug. Scu tgi Luzi Thomann ò testifitgia anvers la FMR chintan els igl pi tard igl schaner 2027 da surpiglier definitivamaintg chel schaschant. Realitad seia tgi igl object vigna scarpo giu e svanescha uscheia or digl maletg digl li. Igl nov project duess cumpiglier abitaziuns, locals per affars, gist noua tgi igl restorant sa catta ed aint igl plang noua tgi la Banca Cantunala ò igls sies biros. Chella vigna alloura a piglier a fit igls locals basignevels, pertge da preschaint seia la Banca Cantunala proprietaria an condomini (Stockwerkeigentümerin) digls locals aint la partera digl bietg. Ainten las proximas emdas ins viglia er gio inoltrar agl cumegn da Surses la lubientscha pigl nov object, ò detg Luzi Thomann. La fegnameira digls novs proprietaris è da crear ensatge attractiv pigl li, pigl turissem ed en bel bietg tgi serva an plessas modas e manieras.

Mellas e mellas artetgels

Sonda passada è sto igl amprem de tgi la gliout ò pudia cumprar igl inventar ed igl mobigliar digl Hotel Danilo. Gio en’oura avant tgi la vendita e la liquidaziun ò scumanzo era avant l’antrada digl hotel dalla vart digl stradung ena colonna lunga. Fatg venal è nia igl inventar cumplet, massada roba, per part belas tgossas e per part bler crom e roba da paca valeta. La roba è da cumprar, cun pacas excepziuns, per en prietsch modest. Scuntro ins ò bleras persungas indigenas, dall’antiera Svizra Orientala ed er da Turitg e conturn. Gist cun autos da furniziun e camiuns pi pitschens èn igls cumpraders nias a Savognin. Igl pi bagn è sa vandia igl mobigliar dallas tgombras. Oliver Bühler ò menziuno anvers la FMR tgi blera roba seia neida vandeida gio avant la liquidaziun, cun aveir fatg venal chella sur igls meds digitals. La hetta Pianta a Radons, en camp per gruppas, e l’ustareia da muntogna Steil’alva, èn venavant an possess dad Oliver Bühler e vignan igl anviern proxim er manos dad el.

Siva 59 onns istorgia

Igl Hotel Danilo è prest seis decennis sto en’instituziun, cun excepziun digls davos tschintg onns. Scu er otras tgesas ò igl Hotel Danilo gia bungs onns, gea schizont fitg bungs onns. Igl svilup turistic a Savognin ò scumanzo igl 1962 cun neir fundada la societad da pendicularas Nandro SA. Averta è neida la soptgera da Savognin a Tigignas e surdo agl travagl èn er nias igls runals da Somtgant e digl Piz Martegnas. Cun flureir igl svilup digl turissem on Marc Antona Pianta e la sia donna Dora Pianta, barmeirs, biagia igl 1966 igl Hotel Danilo ed or digl clavo e davanto igl restorant Val Verda. En dancing ed er ena bar da tgesa on cumpletto chel project. Pi tard è alloura er anc neida vetiers la Piano Bar.

Igls amprems 19 onns èn directours stos responsabels per la direcziun digl hotel, tranter oter er Daniel Bosshard, igl actual mastral digl cumegn da Silvaplana. A parteir digl 1985 on igls fardagliuns Alfonso Pianta, barmeir, e Clarita Klee-Pianta surpiglia la direcziun digl Hotel Danilo. Igl 2021 ò igl Hotel Danilo mido possessour. Cumpro chel ò Oliver Bühler, en gastronom ed impressari tgi stat siva da dus onns aint igl Tessin. A parteir da lò è igl hotel ia da mal an mender, cun mantger igls giasts e cun betg esser avant mang la persunga tgi stat alla testa digl antier menaschi. Ossa damai siva 59 onns è igl Hotel Danilo istorgia – en’istorgia tgi sa lascha strousch repeter: Hotel e restorant occupos, las bars cun blers giasts e concerts cun La Compagnia Rossini, igls Fränzlis da Tschlin, la Streichmusik Alder, la band da jazz Walter Weber, concerts da Polo Hofer e Gianna Nannini scu giast regular. (fmr/gns)