Abunar en hotel – chegl è pussebel a Lai
«All You Can Sleep» costa en zichel daple tg’en abunamaint da fitness. La differenza è: ins na stò betg far fitness, mabagn ins dastga durmeir tantas gedas scu chegl tg’ins less durant la proxima staschung d’anviern ainten en hotel dalla gruppa Revier. En discurs cugl inventader da chella purscheida.
«All You Can Eat» – magler per en prietsch fix tant scu tg’ins less. Chel slogan è ancunaschaint gliunsch anturn. Ma «All You Can Sleep» è en nov fenomen. Per 999 francs ò en hotel a Saas-Fee fatg amogna igl anviern passo abunamaints da pernottar. La suletta restricziun: igl è sto pussebel da reservar pir dus deis avant.
Igl hotel a Saas-Fee totga tar la gruppa da hotels Revier. Chest onn schlargia la gruppa la sia purscheida. Tranter oter dattigl igl abunamaint er per igl hotel Revier Mountain Lodge a Lai. Igl schef dalla gruppa, Daniel Renggli, daclera tge tgi stat davos l’ideia.
FMR: È «All You Can Sleep» sto la Vossa ideia?
Daniel Renggli: Betg angal la mia. La nossa gruppa da hotels ò sviluppo l’ideia ansemen cun la gliout digl marketing.
È la Vossa gruppa stada l’amprema an Svizra cun ena tala purscheida?
Ia savess betg tgi er en oter hotel svizzer vess gia la madema purscheida.
Dattigl chegl er aint igl exteriour?
Precis chel model vainsa vasia anc nagliour. I dat forsa purscheidas sumigliaintas, chellas èn dantant cumbinadas cun ena commembranza.
Quants giasts on cumpro gl’onn passo en abunamaint dad «All You Can Sleep» aint igl Voss hotel a Saas-Fee?
Circa 100 giasts. Chel tg’è nia igl pi pac, ò pernotto quatter gedas. Chel tg’è nia igl pi savens, ò pernotto 44 gedas ed ò damai paea circa 23 francs per notg. Igl abunamaint vala digl reminent per ena tgombra, noua tgi dus persungas dastgan star sur notg. Tgi tgi ò en abunamaint, pò damai neir cun ena ulterioura persunga tgi paia navot.
Tge è la Vossa fegnameira cun chella purscheida?
L’antschatta ègl sto ena acziun da reclama, da PR. Nous vagn detg, ossa faschainsa puspe eneda ensatge sturn per attrer l’attenziun. Chegl ò funcziuno, nous vagn catto ena bunga resonanza ainten las medias. Ma nous na pudagn sa tgapescha betg veiver da chegl. Alla fegn digls chints ègl ena sort «Restplatzbörse» per occupar tgombras tgi rastessan schiglio veidas. Igl mender per en hotel èn gio tgombras veidas.
Dattigl anc oters avantatgs?
Giasts tgi pernottessan schiglio eneda ainten egn hotel ed alloura ainten en oter, pudainsa liier cun igl abunamaint ve dalla nossa gruppa. Tgi tgi ò en abunamaint, fò la gronda part dallas sias vacanzas aint igl noss hotel. Igl disavantatg è tgi la purscheida strocla igl prietsch, glez mossa igl exaimpel digl om tgi ò pernotto 44 gedas. Ins na pò betg influenzar quantas gedas tg’en giast vign.
Scu on reagea igls giasts tgi paian igl prietsch regular?
Igl è do nignas reacziuns negativas, chels giasts pon gio reservar. Chel tgi ò en abunamaint na so betg, sch’el survign ena tgombra u betg – chegl è la differenza principala. Igl è scu dad eir la seira aint igl Denner per cumprar roba tg’è scretga giu. Ins na so betg, sch’ins survign ensatge tg’è scretg giu. Ma chel tgi compra gio igl avantmezde igl pang, lez ò sieir igl sies pang.
La proxima staschung faschez Vous amogna igl abunamaint anc ainten ples hotels. Igl abunamaint costa pero 1111 francs. Pertge vignigl pi tger?
Durant la davosa staschung d’anviern ò igl abunamaint antschet pir igls 20 da schaner. Chest onn vala el gio a parteir digls 5 da december. Ins pò cumprar el mintgamai per egn digls noss hotels a Saas-Fee, ad Adelboden, a Lai u bagn aint igl Montafon. Alloura dattigl anc en abunamaint per tot chels hotels ansemen, lez costa 1999 francs. E la fegn finala purschainsa en abunamaint per 3333 francs tgi vala igl antier onn per tot chels hotels da Revier.
Quants da chels abunamaints vez Vous gio vandia?
Radond 45 abunamaints.
Visavi agl onn passo vez Vous dantant fatg ena restricziun impurtanta. Ins dastga restar mintgamai angal per tschintg notgs. Siva ins stò interromper la dimora, avant tg’ins dastga turnar puspe aint igl hotel. Pertge?
Nous vagn gia enqual persungas tgi on do a tschains lour abitaziun da vacanzas ed on cumpro perancunter en abunamaint tar nous. Chegl n’è sa tgapescha betg igl scopo. Perchegl na vandainsa er betg ple abunamaints a persungas tgi on igl domicil u bagn ena tgesa da vacanzas aint igl li.
Tge sort da giasts compran ansomma tals abunamaints?
Per ensatgi tgi less eir cun skis la fegn d’emda n’ègl betg adatto. Ins stò pudeir veiver cun la malsiertad tg’igl n’è betg adegna disponibel ena tgombra.
lgl favrer e sur Nadal e Bumang n’èn prubablamaintg libras nignas tgombras? Igl abunamaint è damai adatto per ensatgi tgi vo cun skis igl schaner ed igl mars?
Forsa dattigl er eneda ena tgombra libra igl favrer. Dallas 150 pernottaziuns tg’ins pò far durant ena staschung d’anviern, catta en abunent prubabel plaz durant 100 deis. Ma chels deis tgi tots lessan er, per exaimpel la fegn d’emda, n’ègl per solit liber navot.
E tge vigliadetna on igls giasts tgi compran en abunamaint?
I na dependa betg tant dalla vigliadetna, mabagn pitost dalla flexibladad. Sch’ins na pò betg eir las fegns d’emda, ins stò pudeir far liber durant l’emda. Ozande dattigl adegna daple gliout tgi ò ena tala flexibladad. Ideal ègl sa tgapescha er per gliout pensiunada tgi pò decider spontanamaintg dad eir en pêr deis cun skis.
Gido scu scolar ainten l’ustareia
Daniel Renggli (56) è carschia se agl lai da Turitg. «Ia sung carschia se ainten en’ustareia», dei el. Igls sies genitours on mano igl «Schiffli» a Horgen. Scu scolar ò el gido mintgamai sur mezde davos igl buffet. Oz abitescha el a Lantsch ed è schef dalla gruppa da hotels Revier.
La sia carriera ò Daniel Renggli antschet tar Hotelplan, noua tg’el ò luvro ainten differentas funcziuns directivas. Scu cunsiglieder ò el fatg pi tard sanaziuns da cadagnas da hotels. Igl 2013 ò la gruppa da hotels Revier davert igl amprem hotel, igl Privà Alpine Lodge a Lai. Igl pled rumantsch «privà» monta «cumadevel», «intim» e «famigliar». Igl Privà Alpine Lodge cun 456 letgs è sto ples onns igl pi grond hotel aint igl Grischun – anfignen tg’igl Rocksresort a Laax ò angrondania.
Oz posseda la gruppa Revier hotels ainten quatter destinaziuns svizras, ainten dus destinaziuns austriacas ed a Dubai. La gruppa è ena feglia da Fortimo, l’interpresa d’immobiglias digls dus frars Philipp e Remo Bienz. (fmr/vi)
Gust da leger dapli?