Lectura Rumantscha

I na va en la vita betg adina sco ch’ins vul. Ina floscla, ma igl è tuttina uschia. Quai sas ti segir era suttascriver. En talas situaziuns èsi da reponderar decisiuns, da prender novas decisiuns, forsa schizunt creativas u tut tenor era be far in pitschen pass enstagl il grond planisà, uschia sco tar las tematicas da la Lectura Rumantscha dad oz.

Adia Surselva Maraton, bainvegni cursa da saira

Il mars 2025 èsi vegnì communitgà ch’i na dettia betg pli il Surselva Maraton a Sedrun/Rueras. Ina gruppa da trais persunas na vul dentant betg ceder e porscher vinavant cursas da passlung en Val Tujetsch – e quai sin livel regiunal, chantunal e naziunal. In termin è gia fixà, numnadamain il favrer cun ina cursa da saira cun illuminaziun.

Era passins mainan a l’arrivada

Il project da construcziun Alvra a La Punt Chamues-ch vul stgaffir abitaziuns pajablas per indigens ed indigenas. Il credit per las quatter chasas aveva la vischnanca gia deliberà, ma lura hai da recurs cunter duas chasas sin ina da las duas parcellas. Enstagl da spetgar la decisiun da la Dretgira superiura, ha la vischnanca simplamain decis d’etappar il project, uschia che las lavurs per tschellas duas chasas cumenzan gia la primavaira. Pass per pass a l’arrivada.

Avrir la chasa per autras persunas

En situaziuns difficilas èsi da tschertgar schliaziun insolitas. La chasa d’attempads Da Casa Val Lumnezia a Vella ha da batter cun mancanza da persunal e na po uschia betg occupar tut ses letgs. Perquai va ella novas vias: La chasa avra sias chombras per giasts ch’èn reconvalescents e na dovran nagina tgira u be pauca.

Ti has prendì ina buna decisiun da leger la Lectura Rumantscha. Bun divertiment!