Saira charitativa da la Società da promoziun Regiun Parc Naziunal

La Società da promoziun Regiun Parc Naziunal daja illa fuorma actuala daspö il 2008. Fingià a partir da l’on 1996 haja dat üna promoziun dal sport da skis illa regiun da l’Engiadina Bassa/Val Müstair/Samignun. Lura amo suot il nom SNAF (Snowboard – Nordic – Alpin – Fun). La finamira da la società es da sustegner finanzialmaing a giuvnas atletas e giuvens atlets da la regiun sün lura via vers il sport d’inviern professiunal. D’incuort ha gnü lö a Scuol üna saira charitativa da la società cun üna discussiun al podi ed üna tschaina per dir grazcha a donaturs e sponsuras per lur sustegn finanzial.

Trais exaimpels cun success

«Noss atlets da la regiun pon profitar da las structuras chi sun aint illa classa da sport a la Sports Academy a l’Institut Otalpin a Ftan. E nus guardain da finanziar üna part da quella per ch’els rivan da finanziar a sai svess cul sport», ha dit il president da la società Mario Denoth in occasiun da la saira charitativa invers RTR. Daspö blers ons sustegna la società a sportistas e sportists regiunals cun circa 200 000 francs per on per cha quels possan trenar professiunalmain  lur sport da pitschens insü. La Società da promoziun es ün center da prestaziun da Swiss Ski e sustegna a sportistas e sportists illas disciplinas ski alpin, nordic, biatlon e snowboard.

Ils trais sportists Dario Cologna, Nevin Galmarini e Sandro Viletta han curunà lur carrieras sportivas cun almain üna medaglia dad or olimpica. Tuots trais sun its a scoula illa Sports Academy e tuots trais han pudü profitar da la Società da promoziun da la Regiun Parc Naziunal.

45 giuvnas atletas ed atlets

Ün seguond intent da la saira charitativa – sper l’ingrazchamaint – d’eira da muossar che chi’d es pussibel da ragiundscher sco sportista o sportist. Implü s’haja eir pudü dudir che chi muainta la società. Actualmaing treneschan circa 45 giuvnas atletas ed atlets i’l center da prestaziun. Il futur muossarà, scha ulteriuras grondas sportistas ed ulteriurs gronds sportists vegnan our da la cella da trenamaint da la regiun Engiadina Bassa/Val Müstair/Samignun.