Sorts veglias sil taglier

Peter Enz ei amatur da sorts veglias da puma. El s’auda tiels specialists svizzers dalla culinarica cun fretgs indigens. Cun passiun retscherca, explorescha, scuviera e promova el tut quei che ha connex cun sorts veglias ed emblidadas. Dapi varga 50 onns eis el colligiaus culla Surselva, el ei era commember dall’uniun da pomicultura Surselva. Quella ha ussa envidau Peter Enz da referir davart sia savida, sias enconuschientschas ed experientschas. «Nus envidein in e scadin ad in referat tut aparti cun degustaziun», scriva l’Uniun da pomicultura Surselva en sia communcaziun. El vegni a referit davart las sorts veglias da puma, lur diever per la tratga da puma e lur valur pertuccont la midada dil clima. Da principi tracta il referat buca mo meila, mobein era autras specias, pia péra, zuescas, plogas, cudugns ed autras. Il referent vegn a plidar dalla pomicultura grischuna e presentar entginas sorts tipicas dil cantun muntagnard. Buca mo tedlar e mirar, mobein era degustar astga ils visitaders da quell’occurrenza. «La pintga degustaziun duei accentuar il diever culinaric en cuschina da quellas sorts», scriva l’uniun.