13 fracziuns cun in uorden da parcar

Ella fracziun dil marcau da Glion existeva gia dapi igl onn 2015 in uorden da parcar ch’era vegnius decidius dil parlament communal. Quei uorden seigi aunc actuals e sappi vegnir surprius cun adattaziuns el niev uorden per l’entira vischnaunca, di Michael Spescha, il menader dalla canzlia dad Ilanz/Glion. «Quei che nus havein stuiu far a basa dalla lescha ch’il parlament ha approbau 2024, ei in’ordinaziun ch’includa tuttas tredisch fracziuns dad Ilanz/Glion.»

L’ordinaziun da traffic e da parcar hagi ina liunga historia cun biaras sfidas pils planisaders e per la politica communala, declara il canzlist: «Per metter en vigur ina tala ordinaziun drov’ei il consentiment da pliras instanzas. Plinavon sto la decisiun d’approbaziun vegn publicada el Fegl Ufficial Surselva. Quella publicaziun sebasa sillas disposiziuns dalla Polizia cantunala e possibilitescha alla populaziun ed als interessai da far propostas encunter igl uorden da parcar previu.» La suprastonza communala hagi acceptau igl uorden da parcar che sebasi silla lescha en vigur dapi l’entaschatta digl onn 2024, di Michael Spescha che ha accumpignau l’entira procedura. La resalisaziun digl uorden da parcar niev sappi silsuenter succeder el decuors dalla primavera/stad 2026 cun montar la signalisaziun.

Historia cun dissonanzas

La historia dalla lescha e cunquei era dall’ordinaziun da traffic e da parcar dad Ilanz/Glion ha entschiet igl onn 2020. A basa d’in inventari da tut ils parcadis publics en vischnaunca ha la suprastonza communala incumbensau in biro da planisaziun da traffic da far ina proposta per in concept da parcar. Il scarvon communal Michael Spescha seregorda che la proposta dil planisader seigi stada quella da scaffir ellas fracziuns in scamond da parcar general. En ina zona cun scamond da parcar general eisi scumandau da parcar dapertut cun excepziun dils parcadis ch’ein defini e signalisai. Michael Spescha di: «Quella proposta ha leventau reacziuns massivas. Nus havein duvrau ditg per la discussiun e per cattar ina sligiaziun acceptabla per tuts.»

Leusuenter dat ei ussa ina zona cun in scamond da parcar mo ella fracziun da Glion. Ellas autras dudisch fracziuns san ins parcar tenor signalisaziun. Tenor il scarvon hagi la vischnaunca ussa scaffiu la basa legala per finalisar igl uorden da parcar. El medem mument cullas disposiziuns ufficialas dalla Polizia cantunala vegn la vischnaunca dad Ilanz/Glion ad envidar la populaziun a duas seras d’informaziun a Castrisch ed a Rueun. E pér suenter quellas seras d’informaziun e discussiun suondi la publicaziun dall’ordinaziun el Fegl Ufficial Surselva, di el.

Pagar digitalmein e cun muneida

Il canzlist communal dad Ilanz/Glion accentuescha ch’ei seigi ozildi da possiblitar da pagar ils parcadis a moda e maniera digitala. Da l’autra vart seigi el cunscients ch’ei detti persunas che hagien buca telefonins cun app ni che prefereschien insumma da pagar ils parcadis cun muneida. «Perquei havein nus per exempel il Plaz fiera a Glion ch’ins ha la pusseivladad era egl avegnir da pagar a moda digitala e cun muneida. Il medem vegn ei a dar a Fontanivas ella vischinonza dil bogn aviert. Era leu dat ei in’ura da parcar ch’ins ha la pusseivladad da pagar cun Twint, Parkingpay ni cun muneida.»

En auters loghens dil marcau cun paucs parcadis in sper l’auter rendi la gronda investiziun per in’ura da parcar buca, di Michael Spescha. Ils cuosts per in’ura da parcar muntan a varga 6000 francs. Perquei detti ei en quels loghens la pusseivladad da pagar cun Twint ni cun l’app Parkingpay. Quella app seigi sempla d’applicar ed ins sappi cargar giu ella sigl agen telefonin. Parkingpay hagi igl avantatg ch’ins sappi era semplamein prolunghir il temps da parcar dil telefonin anora, sch’ins seigi per exempel occupaus en ina sesida ni viseta dil miedi che cuozzi pli ditg.

L’emprema mes’ura gratuita

Tenor la nova ordinaziun da parcar dalla vischnaunca dad Ilanz/Glion ei l’emprema mes’ura sils parcadis dil marcau da Glion gratuita. Silsuenter eis ei da pagar las taxas indicadas. Ellas ulteriuras dudisch fracziuns ein las empremas otg uras gratuitas e silsuenter eis ei da pagar. Gratuits ein ils parcadis era egl avegnir per hosps dil bogn aviert. Quels han – suenter ch’els han pagau l’entrada el bogn – la pusseivladad d’indicar sil bigliet ed ell’ura da parcar lur numera dad auto ed han lu il parcadi gratuit. Els ston denton haver pagau l’entrada al bogn aviert per saver registrar lur numera dad auto.

Procedura birocratica

«L’entira procedura per la nova ordinaziun da parcar ei fetg liunga e sin fundament dallas pretensiuns dalla lescha surordinada birocratica», declara il scarvon Michael Spescha. «Davos quella procedura stat denton ina lescha ed ina ordinaziun che han duvrau fetg bia temps ed energias entochen che tut ei stau sut tetg.» Ussa seigi ins amiez la runda finala e sche tut mondi bein, sappi ins parter dil fatg ch’il niev uorden da parcar mondi en vigur la primavera ni sil pli tard la stad 2026.