Lectura Rumantscha
La Lectura Rumantscha prenda tai oz sin ina pitschna excursiun. L’emprim giain nus cun in oldtimer, lura ad inspectar in mulin che na fa dentant betg pli farina e suenter giain nus a prender dimora en in hotel cun in abunament tut spezial. Per plaschair, entrar en la Lectura Rumantscha!
Dal termagl a la clamada
D’uffant ha el sco auters era fatg termagls cun autos, oz èn els sia clamada. Simon Bundi, oriund da Zignau, è dapi nov onns curatur ed archivar da la Emil Frey Classics SA a Safenwil/AG. L’istoricher è là tranter auter responsabel per l’exposiziun da pressapauc 100 vehichels per part fitg vegls ed exclusivs. El ha era manà il project da cudesch «Das Jahrhundert des Automobils – Graubünden 1925 – 2025». Ed er en ses temp liber viva Simon Bundi sia fascinaziun per l’auto, il pli gugent senza tetg en ses Alfa Romea Spyder cabrio.
Dal mulin al pumptrack
Il «Muglin d’immez» a Müstair na mola gia daditg betg pli graun. Fin ils onns 1970 è el dentant stà en funcziun – l’emprim mess en moviment cun aua, ils davos 20 onns cun current. Uss è il davos mulin da temp vegl a Müstair dentant en in nausch stadi e vegn sbuvà. El duai far plaz ad in pumptrack.
Da chombras vidas en l’abunament general
Igl ha cumenzà cun in’acziun da reclama che ha dentant tuttina survegnì dapli conturas: A Saas-Fee ha in hotel purschì l’enviern passà in abunament general, vul dir che giasts han pudì pernottar per in pretsch fix pajà ordavant tantas giadas sco ch’els vulevan. L’enviern porscha er l’hotel Revier Mountain Lodge a Lai che tutga a la medema chadaina sco l’hotel a Saas-Fee quel abunament. I saja in pau sco ina «Restplatzbörse», declera Daniel Renggli, il schef da la chadaina d’hotels, cunquai ch’ins po be dus dis avant reservar ina chombra.
Bun divertiment sin nossa excursiun e betg emblidar da metter si la tschinta!
Gust da leger dapli?