Nagina finanziaziun publica per l’ospital da l’Engiadina’Ota

Nauschas novitads per il segund grond ospital dal chantun Grischun, l’Ospital regiunal d’Engiadin’Ota a Samedan. Il mardi saira èn votantas e votants da set vischnancas purtadras da l’ospital vegnids clamads a la votaziun per ina nova cunvegna che duai garantir il futur da l’ospital.

Cun il NA da las vischnancas da Silvaplauna, Madulain e Zuoz è la finanziaziun transitorica da radund 51 milliuns francs ussa dentant definitivamain giud maisa. Era il GEA da las vischnancas da Bever, La Punt Chamues-ch, Schlarigna, Segl na mida nagut vi da questa decisiun. Mo sche tuttas endisch vischnancas avessan ditg GEA, avess la cunvegna pudì vegnir realisada.

Dumonda per in moratori

Ier mesemna ha la gestiunaria da l’ospital, la Fundaziun provediment da sanadad Engiadin’Ota (SGO), reagì sin las decisiuns da votaziun da las vischnancas. Senza la la finanziaziun transitorica daventia la SGO insolventa la primavaira 2026, han communitgà ils responsabels. Perquai dumonda la SGO per in moratori per garantir vinavant ils servetschs per pazientas e pazients.

Cussegl da fundaziun è dischillus dal resultat

In resultat che dettia da studegiar e fetschia er inqual quità, uschia ha commentà Nora Saratz Cazin, la vicepresidenta da la SGO, la decisiun da las vischnancas, però: «Ussa èsi da guardar vinavant e chattar la meglra soluziun che nus pudain chattar sut questas circumstanzas», uschia la vicepresidenta dal cussegl da fundaziun e presidenta communala da Puntraschigna.

Era per la presidenta da la SGO, Selina Nicolay, na saja il temp enfin la votaziun betg stà in simpel, cunquai ch’il tema saja fitg emoziunal. «Nus n’avain betg ina garanzia tge ch’i capita ussa propi cun quest moratori, e gea, quai dat schon da pensar», uschia Selina Nicolay, che è era presidenta communala da Bever.

Cunquai che la SGO è la purtadra da l’ospital a Samedan ha quai era grondas consequenzas per l’entir provediment da sanadad en la regiun. Proxim venderdi s’inscuntra il cussegl da fundaziun a sia proxima sesida per decider davart ils proxims pass.

La lubientscha vegniss restrenschida

Sco quai che l’Uffizi da sanadad dal chantun Grischun lascha savair las medias la mesemna, prenda l’uffizi enconuschientscha da la consequenza, che las vischnancas da la regiun da sanadad Engiadin’Ota n’han nagina cunvegna da prestaziun pli a partir dals 1. da schaner 2026.

En pli regorda l’Uffizi da sanadad a la SGO e las vischnancas purtadras, ch’i dettia tranter SGO e Chantun ina cunvegna da prestaziun che valia. La SGO e las vischnancas sajan obligadas d’ademplir quella. L’uffizi vegn pir activ, sche la cunvegna na vegn betg pli ademplida u sche las premissas per la lubientscha da gestiunar l’ospital n’èn betg pli dadas. En gliez cas vegniss la lubientscha prendida davent u restrenschida.

Il plan B

Ins haja stuì quintar cun in NA tar las votaziuns per la nova cunvegna da prestaziun. E perquai hajan ins elavurà in plan da sanaziun, ha ditg la presidenta da la SGO Selina Nicolay envers Radiotelevisiun Svizra Rumantscha.

Ensemen cun la clinica Gut SA a San Murezzan e l’Ospital chantunal dal Grischun vegnia ussa examinà tge prestaziuns che pudessan vegnir surdadas. Per exempel da concentrar il provediment staziunar ed in cas d’urgenza da 24/7 en in lieu ed in center ambulant cun permanence en in segund lieu. La finamira è da mantegnair il provediment da basa er en cas da crisa. Dapli infurmaziuns duaian tenor la communicaziun suandar mez december 2025.

Quatter vischnancas decidan il december

Las quatter vischnancas da Samedan, Puntraschigna, S-chanf e San Murezzan n’han anc betg decis definitivamain en chaussa. Ellas fan quai pir ils 14 da december a l’urna. Las votaziuns a l’urna planisadas restan era realisadas, sco che la presidenta da l’SGO, Selina Nicolay conferma envers RTR. Ins veglia dar a mintga persuna en l’Engiadin’Ota la pussaivladad da s’exprimer e votar. (rtr/fmr)