Surmeir ò ossa er pumpiers giuvenils

An Svizra dattigl radond 250 gruppas da pumpiers da giuvenils cun vers 3200 mats e mattas. Siva dall’emda passada dattigl en’ulterioura gruppa da pumpiers da giuvenils. A Surava on igls treis Corps da pumpiers Alvra, Barvogn Filisour e Surses preschento igl project per la realisaziun dalla gruppa da pumpiers da giuvenils per chellas treis organisaziuns da pumpiers da Surmeir. Igls 13 mats e las otg mattas tgi vevan s’annunztgia e musso interess per chella gruppa da pumpiers da giuvenils èn nias infurmos dallas fegnameiras, digl scopo, dalla lavour ed er digls exercezis tgi vign a dar.

Igl intent principal tgi igls treis corps da pumpiers Alvra, Barvogn Filisour e Surses on lia introdueir ena gruppa da pumpiers da giuvenils è naturalmaintg da gudagner commembers per las gruppas da pumpiers uffizialas e sa tgapescha er d’entusiasmar la giuventetna pigl tema pumpiers. Damai ò Surmeir siva dall’emda passada er ena gruppa da pumpiers da giuvenils, detg concret l’amprema ansomma. Igl Corp da pumpiers Vaz/Lantsch ò betg ena gruppa da pumpiers da giuvenils. L’ideia seia pero da fundar egna forsa an dus u treis onns, ò detg Mike Zimmermann, igl cumandant anvers la FMR.

Erueir la grondezza dalla vistgadeira da pumpiers

Aint igl Grischun Central dattigl gio siva da diesch onns ena gruppa da pumpiers da giuvenils. Chegl è la Gruppa da pumpiers da giuvenils Muntogna Tumliastga cun 20 mats e mattas. Coira e Landquart on tots dus ena gruppa da pumpiers da giuvenils cun er en bel domber da commembers e commembras. La gruppa da pumpiers da giuvenils tgi dat da nov an Surmeir chella sa nomna: Gruppa da pumpiers da giuvenils «Suralber». Chel nom dereiva digls amprems bustabs digls treis Corps da pumpiers Surses, Alvra e Barvogn (Bergün).

S’angascheas ferms per introdueir la Gruppa da pumpiers da giuvenils «Suralber» èn cunzont Roland Farrér, igl cumandat digls pumpiers Alvra, Christian Schmid, igl cumandat digls pumpiers Barvogn Filisour e Ramon Collet, igl vicecumandant digls pumpiers Surses. Ramon Collet ò alloura er benevento igls mattatschs e las mattatschas a Surava alla seira d’infurmaziun, noua tgi mintgign e mintgigna on er pudia trer aint l’uniforma da pumpiers per erueir la grondezza individuala da chella. Igl è sto en veir gaudi pigls mats e las mattas da sa vistgeir per l’amprema geda scu pumpier e pumpiera. Igls giuvenils da diesch anfignen 16 onns dalla Gruppa da pumpiers da giuvenils «Suralber» survignan nova vistgadeira tgi vign furneida dalla firma Foppa SA Zezras, en travagl spezialiso per vistgadeira, utensils, equipamaint e roba da pumpiers. Chegl vot deir tgi igls pi giovens pumpiers e las pi giovnas pumpieras da Surmeir on a disposiziun vistgadeira moderna e cunzont adattada.

Quatter provas durant la stad e dus provas igl aton

Alla fegn da chest onn sa reteira siva 19 onns Roland Farrér scu cumandant digl Corp da pumpiers Alvra. Successour dad el davainta Markus Bläsi. Scu tgi igl cumandant partent ò detg anvers la FMR resta el venavant commember da chel corp da pumpiers. Siva digl zarcladour da chest onn è Roland Farrér gio president dall’Associaziun svizra digls pumpiers. Markus Bläsi vign ad esser responsabel cun Ramon Collet e Christian Schmid pigls seis exercezis tgi dat per la gruppa da pumpiers da giuvenils dalla Val Alvra e da Surses. Scu tgi Ramon Collet ò menziuno vignigl a dar quatter provas durant la stad (fanadour) e dus provas aint igl decurs digl aton. Las provas on adegna li la gievgia dallas 18.00 anfignen allas 20.00. Previa è da far las provas a Cunter ed a Surava. Ed eventual er egna a Barvogn.

Mintgamai 5000 francs

Per la realisaziun dalla Gruppa da pumpiers da giuvenils «Suralber» on igls iniziants retschet digls cumegns Albula/Avra, Barvogn Filisour e Surses mintgamai 5000 francs. Chegl è an mintga cass ena buna investiziun: Igl intent dall’antiera acziun è da persvader mats e mattas tgi dovra igls pumpiers, tge muntada tgi chels onn, tge sen tgi fò da far pumpiers ed er tge tgi monta collaboraziun ed abilitad da luvrar an ena gruppa. Er tar ena gruppa da pumpiers da giuvenils mantga betg la disciplina, igl dialog, cumpetenzas digl rom ed er la responsabladad sociala. Igls mats e las mattas amprendan bagn er tge tgi vot deir responsabladad, amiceztga e survatschevladad. Sa tgapescha tgi an acziun an cass urgents, incendis u accidents stradals vignan igls pumpiers giuvenils betg.