Ün NA sainza discussiun a Zuoz
La cunvegna da prestaziun pel provedimaint da sandet in Engiadin’Ota es giò da maisa. In radunanza cumünela ho Zuoz decis, taunt scu eir Silvaplauna e Madulain, da refüser la finanziaziun transitorica pels prossems duos ans. Quella vess pretais ün SCHI unanim in tuottas ündesch vschinaunchas purtedras da la fundaziun SGO. Invezza es que a Zuoz però resulto intaunt il NA il pü evidaint, cun 133 vuschs cunter e 30 vuschs a favur da la cunvegna.
«Eau vess penso cha stainsa cò ün pô pü lönch». Cun quels pleds ho Romeo Cusini, il president cumünel da Zuoz, dit adieu a las votantas e’ls votants chi d’eiran preschaints a la radunanza cumünela in mardi saira – zieva üna radunanza cumünela chi ho cleramaing refüso la cunvegna da prestaziun per la Fundaziun pel provedimaint da sandet Engiadin’Ota SGO. Bod 80% haun dit NA a la dumanda per üna finanziaziun transitiva da bundant 50 milliuns francs pels prossems duos ans.
Opiniuns fattas
La sela da gimnastica da Zuoz d’eira plaina stichida, 164 votantas e votants d’eiran preschaint per la decisiun davart il futur dal provedimaint da sandet in Engiadin’Ota. Els ed ellas vaivan culla missiva dal cussagl cumünel eir arvschieu l’arcumandaziun da refüser la cunvegna da prestaziun proponida da la SGO. E quella arcumandaziun ho evidaintamaing correspundieu a l’opiniun d’üna granda magiurited in sela da gimnastica.
Aunz la votumaziun cun scrutin nun ho que niauncha do üna discussiun aint il plenum, üngüns votums per, üngüns votums cunter la cunvegna da prestaziun. Üngünas replicas a l’argumantaziun da la suprastanza cumünela, üngüns pledoyers a favur da quella. Las opiniuns d’eiran pera fattas già aunz la radunanza, il bsögn da discuter pera na pü avaunt maun.
Uscheja d’eira la radunanza cumünela da Zuoz vairamaing be pü l’execuziun sütta dal process democratic – cun ün resultat chi nu lascha bger spazi per interpretaziuns diversas: Cun 130 vuschs NA cunter 33 SCHI ed üna abstenziun ho la radunanza cumünela da Zuoz zieva ün’ura refüso la cunvegna da prestaziun chi vess garanti a la SGO pels prossems duos ans bundant 50 milliuns francs.
«Üna decisiun davart las finanzas»
Zieva la decisiun clera tratta in radunanza cumünela nu vulaiva il president interpreter quella scu votum da disfiduzcha cunter la SGO. «Per la populaziun nu d’eiran però pü dedas las perspectivas», ho supponieu Romeo Cusini. «I s’ho dumando per duos ans temp per river ad üna soluziun a lungia vista, ma sainza skizzer che soluziun chi pudess alura esser. Nus vessans do oura 50 milliuns sainza savair in che direcziun chi vo.»
Il president e Jachen Delnon, respunsabel i’l cussagl cumünel per las finanzas e pel provedimaint da sandet, vaivan illa radunanza cumünela argumanto per ün NA a la cunvegna. «Nus vains da tscherner traunter duos variantas noschas quella chi ans pera megldra», ho dit Jachen Delnon. «Nus nu trains cò üna decisiun strategica, üngüna decisiun da persunel u davart detagls dal provedimaint da sandet. Nus trains üna decisiun davart las finanzas.»
Tenor sia calculaziun correspundessan ils bod trais milliuns francs cha Zuoz vess stuvieu contribuir a la SGO i’ls prossems duos ans, 1,59 milliuns dal 2026 e 1,32 milliuns dal 2027, fin a 30% da las entredas annuelas da la vschinauncha. «E que cha la SGO ho preschanto in sia cunvegna sun stimas, na imports fixs. Nus pajessans eir schi füss dapü.»
Externaliso decisiun pel futur
Ma cul NA sun quels imports uossa giò da maisa. «Ün votum inaspettedamaing cler», «a drouva ün reset», «la consequenza dal dischuorden economic», «uossa cumainza la lavur» – que sun ils chavazzins chi s’ho pudieu chabler sü zieva la decisiun, cur cha la glieud bandunaiva la sela da gimnastica.
Cu chi vo uossa inavaunt culla SGO e cun l’Ospidel d’Engiadin’Ota – quella decisiun haun las vschinaunchas purtedras uossa do our da mauns. «Que es fich imprubabel cha l’ospidel gnia serro», disch Romeo Cusini. «Ma cul NA vainsa uossa eir decis cha las vschinaunchas nun haun pü inguotta da dir davart quella dumanda.»
Düraunt la radunanza cumünela vaiva el congualo la SGO cun üna maschina da l’artist Jean Tinguely. «Eir quellas nu funcziunan suvenz na precis in quels mumaints chi’s spettess» – e zieva dumando scha’s vöglia uossa «cumader il vegl u s-chaffir spazi per oter». La populaziun ho decis a favur d’üna nouva construcziun e na per üna reparatura. Ma la nouva maschina nu gnaro fabricho ne da Tinguely ne da la SGO – ma d’üna administratura o d’ün administratur cha’l güdisch regiunel imcumbenzaro illa procedura da concuors.
Gust da leger dapli?