Consternaziun en l’ospital a Samedan

Il di suenter la decisiun da trais vischnancas en Engiadin’Ota da dir NA a la nova cunvegna da prestaziun cun la fundaziun per il provediment da sanadad da l’Engiadin’Ota (SGO) (guarda La Quotidiana dad ier gievgia), n’ha il persunal da l’ospital regiunal a Samedan betg cumenzà bain ses di da lavur. Malsegirezza e consternaziun – las emoziuns che regian. Era per il CEO ad interim Rolf Gilgen è la notg stada curta ed el saja tutgà fermamain da la decisiun.

Metter da la vart las malsegirezzas

Era la schefmedia da la pediatria Cathrin Büchi di che la situaziun chaschunia gronds pissers. En ils discurs cun ses collavuraturs e sias collavuraturas haja ella percurschì grondas malsegirezzas. Intginas dad ellas ed els pondereschian era da tschertgar in’autra plazza da lavur. Ella vegn a la conclusiun: «In scenari realistic è che l’ospital e l’Engiadin’Ota vegnan a perder persunal qualifitgà en in temp, nua che quel manca gia.»

Cathrin Büchli vul però vinavant s’engaschar per in bun provediment da sanadad, per ils uffants ed ils giuvenils. Disditgas dal persunal na sajan anc betg entradas, uschia il CEO ad interim da l’ospital regiunal a Samedan. Per Rolf Gilgen èsi cler: «I duai ir vinavant uschè ditg ch’ils meds èn a disposiziun.»

Betg enconuschent, nua che la via maina

Il plan dal cussegl da fundaziun da la SGO è da far durant las proximas emnas discussiuns cun pussaivels partenaris per l’ospital regiunal. En quellas duai vegnir pli cler, nua che la via dal provediment da sanadad en Engiadin’Ota duai manar. Ina opziun è per exempel che la Clinica Gut surpigliass tschertas prestaziuns. Sco quai ch’il CEO da la clinica Silvan Breitenmoser di, sajan els gia adina stads averts per cooperaziuns ed els vegnian er uss a porscher maun. Uss giaja per chattar ensemen las meglras soluziuns per il provediment da sanadad en l’Engiadin’Ota.