Integrau giuvens e battiu cun blessuras

La fin dall’jamna vargada ei vegniu absolviu l’endischavla runda dil campiunadi da ballapei dalla gruppa 1 dalla 3. ligia. Igl ei stau la davosa da quest atun. Suenter quell’emprema mesadad sesanfla Sargans alla testa dalla tabella cun 29 puncts ed aschia in punct avantatg sin Schluein Glion. Trun/Rabius passenta igl unviern sigl otgavel plaz cun diesch puncts e Lumnezia ei novavel cun otg puncts. Sonda, ils 4 d’avrel 2026 cuntinuescha il campiunadi 2025/26.

Schluein Glion: Integrau in tschuppel giuvens

Schluein Glion ha entschiet il campiunadi igl uost cun ina terrada encunter Mels. Cuort suenter ei suandau in remis encunter il capogruppa Sargans. Pigl auter ha Schluein Glion gudignau tut ils giugs e sesanfla meritadamein sil secund plaz. «Nus essan cuntents cul campiunadi d’atun, surtut perquei che nus absolvin quel cun ina squadra fetg giuvna», di il schef dil sport dall’USSI, Urs Casutt. Suenter che plirs giugadurs da tschep e cun experientscha han calau da dar activamein ballapei la primavera, ha Schluein Glion integrau plirs juniors A cun ina vegliadentga da 16 ni 17 onns ella squadra. «Igl ei juniors cun qualitad. Ensemen cun giugadurs rutinai fuorman els il mument ina bun’equipa. All’entschatta dalla stagiun era ei buca da quintar che nus seigien la fin digl atun sil secund plaz», puntuescha Urs Casutt. Ussa suonda la pausa d’unviern. «Naven dil december trenescha mintga singul individualmein. Il fevrer s’entupein nus lu als emprems trenaments», di Urs Casutt.

Giug per giug pli stabils

Ell’emprema fasa dil campiunadi quest atun ha Schluein incassau dabia gols. Tenor Urs Casutt eis ei lu reussiu da far ina migliur en quei grau: «Quei havein nus analisau e havein saviu curreger. Igl ei vegniu meglier da giug tier giug, aschia ch’ei ha dau dapli stabilitad al giug.» La finamira per la secunda mesadad dil campiunadi primavera seigi da cuntinuar aschia: «Haver plascher da dar ballapei. Nus lein luvrar vinavon consequentamein culs giuvens senza midar la strategia.»

In fetg bien campiunadi ha era la secund’equipa da Schluein Glion dau ella gruppa 1 dalla 4. ligia. Ella sesanfla leu medemamein sil secund plaz. «Ella profitescha il mument d’entgins buns giuvens giugadurs e d’entgins che han era gia dau cull’emprema equipa», constatescha Urs Casutt. L’emprema equipa vegn trenada da Mirco Zala, la secunda da Mario Arpagaus.

Trun/Rabius: Fatg in pass anavon

«Il diember da puncts che nus havein recaltgau quest atun fa buca buna pareta. Culla prestaziun ed il svilup dall’equipa sun jeu denton cuntents», di Claudio Bundi, trenader dall’equipa da Trun/Rabius. Sia analisa: «Per munconza d’experientscha – quei ch’ei gie capeivel tiels biars giugadurs giuvens che nus havein integrau – succedan sbagls individuals. Quels stuein nus empruar d’eliminar. Lu stuein nus emprender d’esser pli efficients avon il gol dils adversaris.» Gianin Derungs ha muncau igl entir atun e Patrizio Decurtins medemamein plirs giugs, omisdus pervia da blessuras. La strategia dil club seigi clara: «Nus lein luvrar culs giuvens, per part ein els ella vegliadetgna da juniors A.» Claudio Bundi constatescha che l’equipa ha teniu petg a tuttas autras igl atun, era sch’ils resultats e la tabella resplendan buca quei.

Buna morala

«L’equipa ha ina buna morala e mentalitad. Nus havein adina puspei survegniu cumpliments d’aspectaturs per nos giugs, surtut co ils giuvens sepresentan», di Claudio Bundi ch’ei trenader da Trun/Rabius dapi treis onns. Ils giuvens stoppien denton emprender e rimnar experientschas. «Plirs giugs havein nus dominau, havein giu grondas schanzas, mo la fin finala survegniu gols», di il trenader. Plirs giugadurs da Trun/Rabius serendan l’auter onn ella scola da recruta. Claudio Bundi spera che quels stettien tonaton a disposiziun all’equipa.

Lumnezia: Biaras blessuras

Il CB Lumnezia, il noviz sursilvan ella 3. ligia, ha terminau la runda d’atun 2025 gest davos Trun/Rabius. E cun quei resultat ei il trenader Marco Blumenthal aschilunsch cuntents: «Nus vein fatg il pusseivel, considerond las biaras blessuras.» Gest quater giugadurs da tschep dalla davosa sesiun en 4. ligia han numnadamein muncau a Lumnezia igl atun. E quei hagi debilitau l’offensiva: «Nus havein cunzun stuiu remplazzar giugadurs da nossa cadeina offensiva. E quei ei nuota stau aschi sempel, schegie che nus vein integrau novs giugadurs giuvens.» La munconza da forzas offensivas ei la finala tuttina semussada: Cun diesch gols ha Lumnezia sittau ils pli paucs en sia gruppa.

In rang el miez dalla tabella

En vesta alla runda da primavera spera Marco Blumenthal ch’ils giugadurs blessai turnien ell’equipa: «Igl ei impurtont che quels giugadurs guareschien bein. E lu, cun in cader pli vast e dapli stabilitad, vegnin nus segir a recaltgar nos puncts la primavera.» Tenor il trenader da Lumnezia stuess la relegaziun numnadamein esser negin tema per els: «Igl ei senz’auter pusseivel per nus da contonscher in plaz el miez dalla tabella. Malgrad las absenzas havein nus numnadamein teniu petg gia igl atun a quasi tuttas equipas.» En Lumnezia ein ins pia optimistics en vesta alla pausa d’unviern. Mo avon ch’ils giugadurs san guder quella, spetga sonda aunc il quartfinal dil Cup grischun encunter la secunda equipa da Cuera 97.

3. ligia, gruppa 1

1. Sargans 11/29; 2. Schluein Glion 11/28; 3. Mels 11/25; 4. Gams 11/22; 5. Walenstadt 11/19; 6. Triesenberg 11/18; 7. Domat 11/14; 8. Trun/Rabius 11/10; 9. Lumnezia 11/8; 10. Cuera 97 11/8; 11. Triesen 11/6; 12. Sevelen 11/3.