Preventiv 2026 quenta cun in gudogn da 260 000 francs

El center dalla novavla seduta da quest onn dil cussegl communal da Mustér la mesjamna sera el Center Fontauna ein las finanzas stadas. Sco quei che l’administraziun communala scriva en ina communicaziun als mieds da massa, ei il preventiv pigl onn 2026 vegnius approbaus suenter entgina discussiun. Il budget dil quen da gudogn e sperdita quenta cun in surpli d’entradas da 260 000 francs. Igl onn 2026 vegn quintau cun in cash flow dad 817 000 francs ed investiziuns da netto 3,825 milliuns francs. Il pei da taglia sin entradas e facultad resta sin 99 % ed il pei da taglia sin schischom sin 1,7 ‰. Il preventiv 2026 vegn suttamess al referendum facultativ.

Investiziuns supportablas

Medemamein ha il parlament priu enconuschientscha dil plan da finanzas pils proxims diesch onns. Quel preveda investiziuns en plirs projects, denter auter la sanaziun dalla serenera a Raveras, il luvratori communal, la sanaziun dalla casa da scola e la secunda etappa dil Center Fontauna. «Tenor il plan da finanzas actual ein quellas investiziuns supportablas», scriva l’administraziun communala.

Cumissiun resta en funcziun

En connex culla tractaziun dil preventiv pigl onn 2025, il november 2024, ha il cussegl da vischnaunca installau ina cumissiun parlamentara da finanzas. «En vesta alla tractaziun el cussegl da vischnaunca la mesjamna sera ei quella cumissiun s’occupada intensivamein dil preventiv 2026», scriva l’administraziun communala. La cumissiun da finanzas seigi secumprovada, aschia ch’il cussegl da vischnaunca hagi decidiu da prolunghir igl engaschi da quella entochen la fin dalla legislatura 2025/2028.