Lectura Rumantscha

Igl è bainbaud fin d’emna e temp per recreaziun. Forsa cun in drink aparti a la Lectura Rumantscha, tge manegias? La nota pitra da la bavronda furma la debatta d’ospitals en l’Engiadin’Ota. Suenter agiunt jau in pau aua frestga: ballapedists sursilvans dovran apunta bler liquid. E la fin garnesch jau il drink cun ina frastga da schember or dal guaud mistic, il Tamangur. Viva!

La basa amara

La decisiun è fatga: Nagina cunvegna da prestaziun per il provediment da sanadad in Engiadin’Ota. Per las collavuraturas ed ils collavuraturs da l’ospital a Samedan è quai ina decisiun pitra. Tge schabegia ussa cun l’ospital? Vegn el serrà u datti ina collavuraziun cun la Clinica Gut? Las reacziuns èn emoziunalas.

La cumponenta fraida

La pausa d’enviern da ballape ha cumenzà. Nairas uras da far ina bilantscha da las trais equipas sursilvanas ch’èn tuttas trais en la medema gruppa da la 3. liga. Schluein Glion ha terminà cun bravura sin il segund plaz, Trun/Rabius e Lumnezia amez il tableau sin plazza otg e nov. Qua hai num sa recrear e baiver in sitg aua frestga.

Il detagl per l’egl

Noss schefredactur David Truttmann ha fatg durant viandar en Val S-charl ina scuverta scandalusa: Il grond poet engiadinais Peider Lansel ha scrit en sia poesia famusa «Tamangur» fake-news. Il guaud da Tamangur sa drizza tenor ina lingia lirica vers damaun, ma quai na constat gnanc. N’è Peider Lansel forsa gnanc chaminà tras il guaud legendar? – Betg avair tema, il poet na perda betg sia reputaziun, sin il pli perda in schember ina frastga – per la decoraziun.

Viva, lascha gustar la bavronda e bun divertiment cun la Lectura Rumantscha!