Daguot e daguot fa aur

Per la quarta ga ei la Destillaria Daguot da Glion da Beni Simeon e Robert Cathomas separticipada alla concurrenza dalla DistiSuisse. E sco gia allas empremas treis ga ha ei era dau uonn arbagias, respectivamein medaglias d’aur ed argien. DistiSuisse premiescha ils megliers vinars e liquors dalla Svizra mintga dus onns.

Treis ga aur – duas ga argien

Pil vinars dalla puauna veglia, la puauna clara e la tscherescha han ils brischavinars Robert Cathomas e Beni Simeon obteniu aur. Leutier ein vegnidas medaglias d’argien pil vinars da jarvas ed il liquor da caffè. Cun quel dil liquor da caffè han els munchentau la medaglia d’aur per sulettamein in punct. Cul vinars dalla puauna veglia ha Daguot schizun contonschiu la victoria ella categoria «Vieille» e quei cun 92 da 100 puncts pusseivels. Las tschun medaglias ein in attest per l’excellenta lavur da barschar vinars che la Destillaria Daguot a Glion presta. «Nus essan fetg cuntents culs resultats», di Beni Simeon che ha representau la destillaria sursilvana alla surdada dils premis a Basilea. Duas ga han ils brischavinars era survegniu il tetel «destillaria digl onn» dalla Svizra, numnadamein 2017/18 e 2022/23.

Fretgs indigens

La Destillaria Daguot ch’ei vegnida fundada igl onn 2013 brischa pliras sorts da fretgs e jarvas. Tenor Beni Simeon e Robert Cathomas producescha ella rodund 8000 butteglias da miez liter per onn. «Nus barschein sulettamein fretgs indigens sco plogas, meila, péra, puaunas e quitas. Leutier vegn il vinars da jarvas», di Beni Simeon e puntuescha: «Nus producin era whisky.»

Las cundiziuns d’insumma astgar barschar ein fetg severas e survegnir la licenza ei cumbinau cun claras directivas. Quellas han ils dus brischavinars contonschiu suenter haver frequentau in tschuppel cuors. «L’idea da barschar vinars ei naschida duront la catscha. Robert ed jeu essan sedumandai tgei trafficar el temps da nossa pensiun», relata Beni Simeon. Detg e fatg e cun bia pissiun e carezia ein els sescolai, han endrizzau lur destillaria a Glion ed aschia fatg ina professiun ord lur pissiun. Ensemen cun lur consortas Justina Simeon e Marianne Cathomas meinan els la destillaria. La successiun dil menaschi para medemamein d’esser garantida. Stiafen, il fegl da Robert Cathomas, ei lundervi da seluvrar en el menaschi e d’absolver ils cuors necessaris. Ils products dalla Destillaria Daguot san vegnir cumprai directamein tier ella a Glion ni en pliras stizuns en Surselva, sco era ella vendita online.

Las meglieras spirituosas dalla Svizra

Igl onn 2011 ei l’organisaziun DistiSuisse vegnida fundada culla finamira da migliurar la qualitad dallas spirituosas svizras ed aschia da dar impuls per buns products als destillaturs. Mintga dus onns organisescha ella ina premiaziun da spirituosas barschadas en Svizra. L’entschatta november ein ils resultats da quest onn vegni publicai ed el rom d’ina fiasta ein las medaglias ed ils diploms vegni surdai.

Gia miez uost haveva la giuria consistenta da 26 persunas giudicau rodund 500 differents products da pressapauc 100 destillarias dall’entira Svizra. Aschia la cumparsa, il fried, il gust ni la fin finala l’impressiun generala dil product. 100 puncts san vegnir contonschi maximalmein. Per products cun 90 puncts ni dapli dat ei la medaglia d’aura, per quels denter 80 ed 89 puncts argien. Tut en tut vegn giudicau spirituosas en 20 categorias. La premiaziun da DistiSuisse ei la pli aulta distincziun che las destillarias en Svizra san contonscher.