«Uossa fa la musica simplamaing bain»
Cha da Fö es darcheu sün turnea. Als 13 november fa’l fermativa a Müstair ed als 14 november a Sent. I’l bagagl dal chantautur e musicist da Scuol as rechatta eir nouva musica.
«Eu n’ha vöglia da sunar e la dumonda es relativamaing gronda, perquai n’haja decis da far quist november üna pitschna turnea.» Uschè simpla es la resposta da Roland Vögtli alias Cha da Fö perche ch’el haja decis da preschantar güsta in november plüs concerts in Grischun. Schlans, Müstair, Sent, Cuoira, Laax stan sül program. Cha’l mais november es ün temp ingio chi nu gira bler illa regiun, sa il musicist e chantautur natüralmaing. «Eu less organisar concerts per indigenas ed indigens e fetsch quai sün agen ris-ch», declera’l.
Als tschinch concerts suna Roland Vögtli chanzuns dal disc cumpact «Automatic», ma eir chanzuns nouvas chi dessan gnir registradas i’l decuors da l’inviern. «Pro las nouvas chanzuns sun eu plü o main tuot ils instrumaints svessa», quinta’l. Planisà es ün album cun desch chanzuns chi dess cumparair dal 2026. A seis stil resta Cha da Fö fidel: pop, rock, folk. «Eu sun ün chantadur rumantsch e pretend jent ch’eu fetscha indie rumantsch», disch l’Engiadinais riond.
Il gir dal temp in fuorma musicala
Las tematicas da sias chanzuns s’han müdadas daspö l’album «Automatic» (2012). Intant es Roland Vögtli bap dad ün mattin da quatter ons ed el svessa es cun 44 ons in ün’età ingio cha las grondas dumondas dal temp til occupan. Il dvantar plü vegl, il passar dal temp, la vista illa mità da la vita, il sguard inavo e dafatta il tema da la mort elavura il chantautur in fuorma musicala. «Dad acceptar müdamaints, da predschar las pitschnas chosas, dad esser grat per quai chi s’ha illa vita, per quai vaja a la fin finala», declera Roland Vögtli. Cun sia musica less el dar ün sguard vers l’interiur. E da tschella vart saja quai eir sco üna sort «discuors cun Dieu».
«Eu am fetsch las grondas dumondas: Chi sun eu? Possa acceptar mincha part da mai? Ingio esa lö per svilup?» Bleras chanzuns ha’l, sco ch’el disch, scrit sün ün viadi culla rulotta tras Marocco l’inviern 2023/24. Las stads ch’el passainta ad alp cun sia duonna Jelscha e seis figl invezza sun plütöst implidas cun blera lavur corporala. Ün bun equiliber, chatta l’Engiadinais. «In avegnir lessa però dar darcheu daplü concerts», tradischa’l.
Musica nu sto plü esser success
La musica es fingià tuot la vita da Roland Vögtli centrala per el. El ha sunà in diversas bands, per exaimpel «Andarojo» e «Nau». Success sur il cunfin svizzer oura ha’l gnü cun «Me&Marie». Sco Cha da Fö è’l in gir sco solist. Quatter ons ha Roland Vögtli fat posa da la musica, ün temp ch’el ha dovrà per chattar darcheu sia creatività. «Far musica s’ha müdà per mai cumplettamaing», disch il chantautur. Amo avant desch ons d’eira seis böt principal quel dad avair success culla musica. «Uossa fa’la simplamaing bain.»
Üna grond’inspiraziun saja seis figl. Bap e figl fan insembel eir musica. «Üna chanzun sül nouv album es dedichada a Gion», tradischa il musicist. Chi chi ha buonder da dudir la nouva musica da Cha da Fö o ha plaschair da tadlar sia musica cuntschainta ha occasiun da far quai als 13 november i’l Tablà Salis a Müstair o als 14 november illa Grotta da Cultura a Sent. Ils concerts cumainzan a las 20.15.
Gust da leger dapli?