«Empruar da tschaffar la glieud»

«La finamira da mia funcziun sco assistenta pastorala ei da tschaffar la glieud. Quei ei denton ina gronda sfida», di Rilana Cadruvi Scherrer (mira era box). Igl emprem d’uost 2025 ha la mumma da quater affons che habitescha cun sia famigia a Trun surpriu la plazza ellas pleivs dallas treis vischnauncas da Sursassiala sisum la Surselva. En quels rodund tschien dis ha ella empriu da seviver en en quellas: «Mintgina da quellas treis pleivs ha in’autra purschida e structura ed era ils basegns ein fetg differents a Mustér, Medel e Tujetsch. Jeu hai denton giu fetg interessants discuors. Els gidan mei a far ponderaziuns co ademplir miu survetsch.» Rilana Cadruvi Scherrer di ch’ella seigi vegnida retschevida cun bratscha aviarta: «Jeu sun surstada dils biars resuns positivs ch’jeu hai retschiert.» Satisfatga eis ella era dalla collaboraziun culs funcziunaris dallas treis pleivs, surtut cun sur Mathew Kurian, sur Giusep Venzin e sur Alexi Manetsch.

Ei maunca persunal

«Dils discuors ch’jeu hai menau entochen ussa resorta claramein ch’ei maunca persunal. Essenzials ein tenor miu manegiar surtut ils cussegls pastorals. Els han d’ademplir impurtontas funcziuns, surtut pil sustegn dils spirituals ni en cass che quels mauncan. En quei connex savess ins forsa schizun patertgar in mument vid in cussegl pastoral regiunal cun persunas da tuttas treis pleivs che havessen lu incumensas enteifer lezzas», di Rilana Cadruvi Scherrer e fa gest la punt tier in dils pli gronds problems dalla Baselgia: «Il mument havein nus en Svizra sulettamein rodund diesch seminarists da teologia. Perencunter ei la mesadad dils spirituals ch’ei oz aunc en funcziun, en pensiun en diesch onns. Cheu sisum la Surselva havein nus il grond cletg che nus havein aunc la claustra.»

Esser presenta ed animar

Cun sia preschientscha ad occasiuns dallas treis pleivs vul Rilana Cadruvi Scherrer scaffir ina reit da contacts ed animar las parochianas ed ils parochians da vegnir als survetschs divins e da surprender incaricas. Vegnir en contact vul ella denton era culla giuventetgna. «Ella ei il mument buca tschaffabla e nus stuein sedumandar co nus savein midar quei. Ei fuss bi sche dapli giuventetgna fagess per exempel parada ni tschupials. La giuventetgna savein nus denton tschaffar sulettamein, sche nus fagein era zatgei ch’interessescha ella.» En contact – eventualmein cullas uniuns da giuventetgna – vegli ella empruar da porscher cuntegns era pils giuvenils cun salvar la fuorma dalla liturgia. «Per mei ei igl ir denter la glieud era pastoraziun», di Rilana Cadruvi Scherrer.

Collaboraziun ei indispensabla

Rilana Cadruvi Scherrer ei engaschada il mument en ina plazza da 30 % tier las treis pleivs. La finamira dallas pleivs ei denton d’augmentar quei pensum. «Da principi havess ei lavur per ina plazza da silmeins 120 %», di ella. Il mument ein sias capacitads limitadas surtut pervia dil studi dalla teologia sco collaboratura pastorala ch’ella absolva al seminari da s. Leci a Cuera. Quel terminescha ella igl onn vegnent. Mo gia spel studi e la lavur da s’organisar vegn ella ad ademplir beinspert funcziuns ellas pleivs en fuorma da survetschs divins dil plaid sco per exempel devoziuns. Medemamein astga ella concelebrar.

Seras da bibla

Sper las incumbensas en fuorma da survetschs divins dil plaid vul Rilana Cadruvi Scherrer era arranschar sentupadas tematicas: «Duront la proxima Cureisma less jeu porscher quater seras da bibla a Mustér per las treis pleivs.» Ei fussi era bi, sch’ei fussi pusseivel d’arranschar survetschs divins campesters alternontamein ellas treis pleivs. Quei fussi ina caschun da far punts e scaffir ina cuminonza aschidadir pil mingadi. «Probabel va ei igl avegnir buc auter che da scaffir regiuns pastoralas sco ussa sisum la Surselva. Mo aschia savein nus dar il damogn allas sfidas, denter auter era pertuccont la digren da parochianas e parochians. Cun structuras savein nus era scaffir cuminonza», di Rilana Cadruvi Scherrer. Medemamein vegli ella empruar d’involver pli fetg las catechetas ed ils catechets dallas treis vischnauncas.