Igl gioi agl liber sa meta an movimaint

Igl teater agl liber «Das Kraftwerk» vean a vagnir do trànter igls 6 ad igls 23 d’avust 2026 damanevel digl mir da farmada a Balamburtg. Mo gea uss â’l levanto grànda resonànza: Passa 190 dellas a dels da la regiùn ân s’anunztgieu par sapartizipar. I radin blear angaschamaint, creativitad a faszinaziùn par meter a strada que project an tres lungatgs. Quegl damussa da maniera impressiunànta, quànt profundameing c’igl project tschientanar da la construcziùn da las ovras electricas e ànc adigna preschaint tier la populaziùn ad influenzescha la veta an la Val Schons ear ànc oziglgi.

Agl zenter stat l’ovra electrica

Agl zenter digl toc stat la construcziùn da l’ovra electrica Ragn Posteriur-Valle di Lei (1956 – 1960) – egn evenimaint c’incantava a polarisava alura la glieud da la regiùn, midànd da radaint lur veta da mintga gi. «Igl e nut c’â signieu daple lur veta ca l’ovra electrica a la forza electrica», punctuescha igl parsura digl comité d’organisaziùn Daniel Camenisch.

Igl szenari digl teater e actualmeing par vagnir scret da Felix Benesch, egn reschissur a szenarist cun grànda experienztga ad egn fegn sensori par istorgias captivàntas. Sen la tribuna s’antopan giujeaders laics a professiunals. Cun Anita Iselin Soubeyrand, Liviana Degen a Peter Hottinger e’gl gea vagnieu pladieu tres acturs ancunaschaints. Pigl acumpognamaint musical ad igl cor da project procura Christian Klucker.

La sonda proxima â peia liac l’amprema ocurenza d’infurmaziùn publica a l’egna a measa an la sala polivalenta d’Andeer. Las interessadas ad igls interessos survignan investa agl stadi actual digl project, agl plan da provas ad an las blearas pussevladads da far part digl gioi agl liber. La squadra d’organisaziùn anvida tutas a tuts ca vutan easser da la partida par schar reviver daniev l’istorgia da la regiùn.