Harry Potter – pli gugent tard che mai

In dretg fan da Harry Potter na sun jau mai stà. Da giuvenil n’hai jau ni legì ils cudeschs ni guardà ils films. E quai malgrà ch’jau tutgava probablamain tar il public en mira avant passa 20 onns, cura ch’ils emprims cudeschs e films èn cumparids. Ch’i vala la paina da s’approfundar en il mund magic creà da J. K. Rowling constatesch jau ussa pia cun in pau retard.

Ils cudeschs procuran numnadamain era tar creschids per curturella e tensiun, malgrà ch’i dovra cunzunt tar ils emprims dus toms inqual giadas in pau pazienza. Gest tar quels dus sentan ins ch’igl èn cudeschs per uffants. Silsuenter na madiran per uschè da dir betg mo il protagonist Harry Potter, mabain er ils romans.

Anc pli interessant che da mo leger ils cudeschs èsi dentant tenor mai, cura ch’ins cumbinescha la lectura cun ils films. Alura pon ins numnadamain observar tut quellas pitschnas e grondas midadas ch’ils producents dals films han fatg u han stuì far. E sa chapescha ch’ins po uschia era congualar l’ovra litterara cun quella filmica. Insumma, questa cumbinaziun procura per in divertiment supplementar.

Uschia hai jau per exempel era constatà ch’ils cudeschs n’èn betg adina megliers ch’ils films. Inqual adattaziun ha fatg bain a l’istorgia dal mattatsch che ha survivì. Al film mancan dentant, sco ch’igl è da princip da spetgar dad adattaziuns filmicas, bleras infurmaziuns ch’ins chatta en ils cudeschs. Be guardar ils films n’è pia era betg ina schliaziun eleganta. Ma probablamain èsi il meglier, sche Vus sezs faschais l’emprova. E sche Vus na vulais betg cumprar ils cudeschs, pudais franc laschar regalar in per Nadal.