Nova veta an la tgea da scola viglia

La Val Schons â consums an las vischnàncas, ella â liacs da dischmessa, plazas da far tarmagls ad autos da posta ca magnan d’egn liac a l’oter. Mo par egna famiglia, an la quala amadus geniturs lavuran, e egn liac da rimnar igl rumient bagn practic, mo betg igl dretg post par dar an tgira igls unfànts! Parquegl e la nova Canorta Gliendeta d’Andeer egn anrihimaint par la Muntogna da Schons a par igls vaschinadis da Sur, Val Ragn, Farera, Andeer, Ziràn/Reschen a Runtgaglia.

Durànt las vacànzas da stad e vagnida restructurada la tgea da scola viglia d’Andeer. Igl antier plantaragn â sasvilupo ad egn pintg parvis par unfànts davent da la vigliadetgna da tres mains. La Canorta Gliendeta e avierta davent digls 4 d’avust 2025 – a la sonda passada â quella anvido ad egn gi da las portas aviertas. Tutas a tuts ca levan, ân savieu prender investa a las novas stànzas a giuder egna marenda ad egn program par unfànts. Tut quegl ân samtgieu las gidàntras ad igls gidànters da la purschida par unfànts anzemel cugls organisaturs da Pro Junior Grischùn, l’uniùn purtadra da la canorta d’Andeer.

Egn liac par sasantir bagn

Durànt egn dascurs â Sandro-Simon Caviezel, igl manader da l’organisaziùn Pro Junior Grischùn, musso las novas stànzas par la tgira digls unfànts. Da las quater stànzas da scola en davantadas sis tgombras ple pintgas. Igls utensils da scola vigls, sco tavlas a pults, ân gieu da svanir. Eschs en vagnieus spustos a pares ân igls luvraints gieu da spazar. Anqual pare nova ad ear egna tgadafiac en vagnidas biageadas aint. Agl bogn e vagnieu plazo egna cumoda par midar peazs agls pops a las tualetas ân ussa tschearcels pintgs pigls unfànts. «Igl â do bleara lavur d’andrizar egna nova localitad da tgira ca satisfa agls basegns par unfànts», gi Sandro-Simon Caviezel. Igl resultat salascha vaser: beals liacs par giujear, egna cumadevla stànza da durmir a mesas par zambargear anvidan par sasantir bagn.

Ear egna tgira cumplementara

Dantànt en ànc betg ocupos tut igls posts par unfànts an la Canorta Gliendeta, declara igl manader da Pro Junior Grischùn: «Savund l’experienztga dovr’igl dus antocen tres ons, antocen c’egna canorta e bagn frequentada.»

Cun la garanzeia da defizit digls vaschinadis pigls amprems tres ons e’gl sto ple sempel da meter an funcziùn igl manaschi. Blearas instalaziùns a mobiglia en donaziùns, ascheia ân igls organisaturs savieu spargnear blears daners. «La nossa Canorta Gliendeta e betga me egna tgea par la tgira d’unfànts, mobagn ear egna tgira cumplementara a la scola ad ear durànt las vacànzas. Ear an cass d’urgenza san ign radir igls unfànts», aczentuescha Sandro-Simon Caviezel. La fegnamira par igl futur fuss dad organisar egna plaza da marenda par quels unfànts da la scola primara a ca visitan la structura digl gi an las uras trànter near suainter scola. Ascheia vessan las scularas ad igls sculars per exaimpel betga da viagear vei ad an nà a Ziràn durànt la posa da miezgi, noua c’igls unfànts ân ussa lur mesa da marandar. Mo quell’ideia e ànc lientsch avagnir.

Egn casti d’aria ad egna roda da furtuna

Igls giasts ân gieu la caschùn da giuder digl gi da las portas aviertas da la sonda passada egn amparnevel program da divertimaint da la damàn a las 10.00 antocen las 16.00. Igls unfànts ân savieu dar sagls segl casti d’aria a giujear l’egn cun l’oter cun diferaints tarmagls. Mesas a bàncs earan lujieus par star a giuder la cumpagneia. Beals premis en stos samtgieus sper la roda da la furtuna, bùnas petas a da bever ân fatg gust da sear nà ànc ampo.

La tgea da scola d’Andeer â peia fatg egn grànd svilup igls davos mains – d’egn vigl plantaragn betg duvro ad egna plaza da giujear par igls unfànts. Beal’ora â sustanieu igl program pigls unfànts ordafora – a visitadras a visitaders ân savieu giuder la marenda agl sulegl d’atun.