Rimnar ils radis a Trin Mulin
L’interpresa SN Erneuerbare Energie AG (SNEE) da Sogn Gagl realisescha actualmein a Trin Mulin in implont solar. Sil mir a val dil stradun digl Alpsu montesch’ins panels solars sin ina distanza da 640 meters. Gl’implont sill’infrastructura publica vegn a producir energia per 50 casadas.
La vischnaunca da Trin ei reha da fontaunas d’aua. Gl’onn 1904 han ils da Trin tratg a nez l’aua dalla Turnigla, per quei intent han ins fundau l’Ovra electrica Mulin. Pli tard ha la vischnaunca dau la concessiun alla Patvag per baghegiar la centrala Pintrun cul lag da fermada viers la Ruinaulta. La producziun d’energia ei e resta ina tematica a Trin. Actualmein realisescha denton buca la vischnaunca, mobein ina firma privata in implont d’energia regenerabla. Quella trai denton buca a nez in’aua da Trin, mobein la forza dil sulegl. Gl’Uffeci da construcziun bassa dil Grischun ha confirmau alla FMR ch’el hagi lubiu la damonda per in implont da fotovoltaica agl ur dil stradun digl Alpsu H19.
Buca in dils gronds implonts
La fin da november vegnien ils panels montai, declara Andreas Jossi. Ei seigi buca in dils gronds implonts, conceda il meinafatschenta dall’interpresa SN Erneuerbare Energie AG (SNEE) da Sogn Gagl. Igl ei l’interpresa che havess bugen realisau en Val Stussavgia ils implonts solars sill’Alp da Tenna e sill’Alp Falätscha. Per munconza da temps ed en consequenza era perquei ch’ei havess buca rendiu, hagien els desistiu da quei project, gi Andreas Jossi en discuors culla FMR. Persuenter han els anflau a Trin Mulin in project pli pign, denton in che selai realisar senza discussiuns politicas.
«Quei project innovativ metta gl’accent sil potenzial dall’energia solara en cumbinaziun cun infrastructura existenta», gi Andreas Jossi. El specifichescha:«Ina fetg gronda cumpart dalla producziun succeda ils meins d’unviern, nus spitgein numnadamein 48 %.» El conferma che la construcziun suten, montada vid la punt cun spunda sur ils quatier Aua Alva e Ruegna, seigi installada e finida. Ussa spetgien ins mo aunc sil termin da montar las tablas solaras, gi Andreas Jossi.
Ella reit da Flims Trin Electric
Aunc uonn duei il niev implont d’ina lunghezia da 620 meters producir, cun ina prestaziun da 477 kWp, pli che 500 MWh current electric. L’energia che gl’implont producescha, va directamein ella reit dall’interpresa locala Flims Trin Electric SA. Sur il consum d’energia scuntrescha quella culla realisadra SNEE che ha finanziau gl’implont.
Andreas Jossi renda aunc attent la FMR ad in aspect che mass bunamein en emblidonza: La punt dil stradun nua che gl’implont vegn montaus cunfinescha culs quatiers Aua Alva e Ruegna. Cun rodund 15 000 vehichels a gi producescha il stradun digl Alpsu pulita canera. «Gl’implont che nus construin ei il medem mument ina preit encunter la canera», puntuescha Andreas Jossi. La montascha dils panels solars retegn quella essenzialmein silla distanza da varga 600 meters.
SNEE, ina sora dalla OEZ
La realisadra digl implont da fotovoltaica a Trin Mulin ei l’interpresa SN Erneuerbare Energie AG (SNEE). Quella ei feglia dalla SN Energie AG da Sogn Gagl ed exista dapi 2012. L’Ovra electrica Zervreila ei medemamein ina feglia e fa part dalla gruppa dapi 1958, pia dapi l’avertura dalla centrala en Val S. Pieder. SN ei la scursaniziun da Sernf-Niederenbach. Gl’onn 1929 han il marcau da Sogn Gagl e la vischnaunca da Schwanden fundau quella societad per la producziun hidraulica. Pli tard ein ils marcaus da Rorschach, Rapperswil-Jona, Arbon, Romanshorn sco era la vischnaunca da Wald ZH s’affiliadas. (fmr/abc)
Panels verticals enstagl horizontals
Gl’unviern ch’igl ei freid drov’ins dapli energia che la stad. Trer a nez dapli la forza dil sulegl san ins cun drizzar optimalmein las tablas neras che «tschetschan» si ils radis dil sulegl. Ellas zonas tempradas cun stagiun d’unviern e da stad variescha la forza dil sulegl. Ellas valladas alpinas ha quei gronda influenza silla producziun d’energia. Gl’unviern leva il sulegl relativamein tard e va baul da rendiu. En valladas nua ch’ils cuolms e la pezza fan umbriva, ston ins drizzar ils panels tenor la posiziun dil sulegl. Entochen avon paucs onns installav’ins ils panels a moda horizontala. Ins ha buca risguardau che la cozza da neiv sillas tablas solaras liua buca schi spert, mobein tacca memia gitg vid quellas. Per ch’ils panels sappien producir effectivamein energia d’unviern astgan els buca esser ils meins da schaner e fevrer pli che 10 % ell’umbriva. Decisivs ei la posiziun dil sulegl il pli cuort gi digl onn.
Ils panels ston esser posiziunai cun in anghel denter 60 e 90 grads, l’exposiziun viers ost, sid e vest sto esser garantida per ina radiaziun globala minimala. Igl ei clar ch’ils panels ston esser montai, pervia dalla neiv, sin ina certa altezia naven dil terren. La posiziun verticala reflectescha la neiv ed era senza neiv duei gl’implont esser adattaus alla posiziun dil sulegl digl unviern. Implonts fotovoltaics vid mirs e fatschadas s’adatteschan il meglier per quei scopo. (fmr/abc)
Gust da leger dapli?