Spleia saragorda digls 30 ons Premi Wakker
An ocasiùn digl giubileum digls 30 ons ca Spleia â ratschiert igl Premi Wakker vean organiso egna discussiùn agl podium davart igl tema «Schurmetg digl maletg da vitgs alpins» c’â liac igl vendargis digls 14 da november, a las 19.00 agl Hotel Speluca.
Uon e’gl 30 ons ca Spleia e vagnieu undro cugl Premi Wakker par la sia cultura da biagear. D’alura annà fa Spleia part digl Inventari federal digls liacs c’en degns da vagnir schurmagieus (ISOS). Que premi e sto egn’undrientscha pigl mantegnamaint da la fatscha digl vitg da Spleia c’exprima, savund l’organisatura, istorgia vivida, identitad a qualitad da veta agl spazi alpin. La sia cultura da biagear e daple ca me estetica: Ella stgafescha atmosfera, sveglia emoziùns ad atira visitaders a visitadras c’anquieran autentizitad.
Discrepànza trànter turissem a veta da mintgagi
Mo co salaschan intermediear oziglgi quellas valurs an vesta a la tensiùn trànter turissem, svilup a veta da mintgagi digls indigens? Par s’avaschinar da quella discrepànza organisescha la manadra par turissem a cultura digl vaschinadi Valragn, Luisa Baselgia, egna discussiùn agl podium cun Marcia Haldemann (Ufezi federal da cultura), Ludmila Seifert (Protecziùn da la patria digl Grischùn), Andrea Bühler-Krebst (professer da la Scola òlta spezialisada, SAS Grischùn), Ivano Iseppi (architect) a Santiago Espitia (Associate Herzog & de Meuron).
Igl dascurs vean mano dad Onna Rageth (SAS Grischùn) ad e egna cooperaziùn digls luvratoris reals da San Bernardegn, da la Bargiaglia a da la Valragn, egn project cuminevel da quels vaschinadis cun diversas scolas òltas ad universitads.
A las 18.00 antscheva igl aperitiv ad a las 18.45 datan Herzog & de Meuron investa agls projects curaints an la regiùn. La discussiùn agl podium antscheva a las 19.00 agl local d’evenimaints digl Hotel Speluca.
Exposiziùn actuala
L’exposiziùn actuala «Spleia, premiieu» partutgànt igl giubileum digls 30 ons Premi Wakker, e realisada digl Schurmetg par la patria ad igl vaschinadi Valragn. Ella mussa an otg staziùns la veia da Spleia par cuntànscher igl Premi Wakker a la stretga relaziùn digl vaschinadi cun la Protecziùn par la patria. La mustra ilustrada cun numerus maletgs a texts magna ear anavos a l’antscheata digl schurmetg da la patria an Svizra a dat investa an las sfidas digl tains preschaint. L’exposiziùn e da vaser antocen la stad 2026 an la Stalla 13 agl Vitg sura a Spleia. L’antrada e gratuita.
Gust da leger dapli?