Buca president, plitost meinagestiun

El seigi in Sursilvan, hagi el ponderau lezza gada. Avon varga 20 onns, cu el hagi calau dad ir a catscha, haveva Arno Arpagaus elegiu in’alternativa. El vuleva ir vinavon siado, els cuolms e silla pezza. Per saver far turas, seperfecziunar e pervia dalla cumpignia hagi el encuretg ina secziun. Sesents a Termin/Trimmis e carschius si a Zezras, fussen la Rätia dils alpinists da Cuera, ni quella dalla Purtenza, stadas pli datier. Arno Arpagaus era denton cunscients da sias ragischs. Siu bab Lorenz Arpagaus ei carschius si a Peiden e sia mumma Paula, naschida Giger, deriva da Platta en Val Medel. Entgins da ses camerats sursilvans hagien intimau el da daventar commember dalla secziun Péz Terri. «Nus essan fetg nuncumplicai», hagien els manegiau.

Negin «cüpli-president»

Cun perschuasiun eis el entraus, e diesch onns pli tard ha el manegiau en in’intervesta: «Tiels Terrians hai gudiu amicezias preziusas, ina scolaziun fundada el sport da muntogna, turas impressiunontas e reminiscenzas profundas». Cun quei fundament ha Arno Arpagaus seschau eleger il november 2014 sco president. Suenter ch’il post era staus vacants in onn ha la radunonza generala a Rabius elegiu el sco successur da Giochen Bearth. Lez haveva menau la secziun duront 12 onns cun grond engaschi e success.

Arno Arpagaus ha giu l’ambiziun da cuntinuar en quei senn e da garantir la prosperitad. «Vus saveis schon eleger mei, stueis denton saver ch’jeu vegn buca ad esser in ‘cüpli-president’, in che va adina a beiber caffè e che pren part ad aperitivs». Sco el raquenta vinavon hagi el dau d’entellir alla radunonza generala sias finamiras. Gl’econom ed inschignier d’economia ha viu che la secziun Péz Terri porscha certas pusseivladads. «Jeu hai vuliu sviluppar vinavon ina secziun attractiva», remarca el. Las duas camonas, quella da Terri entasum la Val Sumvitg agl ur dalla Greina, e quella da Maighels, ella val laterala tuatschina, ein las fontaunas leutier. Omisduas s’audan dapi onns tier las «top ten» dallas 147 camonas dil CAS.

La secziun – ina interpresa

Suenter ch’il presidi era restaus vacants in onn ha el entschiet a realisar certas finamiras. «Per survegnir empau dapli ruaus ed ina structura fixa, havein nus decidiu d’organisar mintg’onn la radunonza generala il vendergis sera ed el domicil dalla secziun, numnadamein a Glion». Quella mesira ha giu gl’effect che la participaziun ei carschida cuntinuadamein. A quella dil november 2024 han 170 Terrianas e Terrians priu part. La radunonza ei cuorta demai che tuttas actas vegnan publicadas el magazin «Terri», la revista dalla secziun. «Aschia havein nus bia dapli peda da s’entupar, nossa glieud appreziescha quella fuorma», declara Arno Arpagaus.

La damonda schebein ei seigi gartegiau da menar la secziun sco interpresa affirmeschan ses consuprastonts. Ellas ed ellas scrivan quei ella revista «Terri» ch’ei cumparida sil termin dalla radunonza generala dils 28 da november. «Quels onns has ti muentau bia en nossa secziun e menau il bastiment adina ella dretga direcziun» ei in commentari. In auter: «Ti eis s’engaschaus enormamein per nossa secziun ed has menau cun passiun, cor e perseveronza».

«Fetg spinus e riscant»

Ils projects da renovar las camonas da Terri e da Maighels e la punt da sugas sur il Rein da Sumvitg ein stai quasi ses «pops», cun realisar quels ha el saviu duvrar sias qualitads da manager. La secziun ha Arno Arpagaus «gestiunau» sper sia professiun sco directur administrativ dalla Scol’aulta specialisada dil Grischun, in menaschi cun 850 persunas en 320 plazzas cumpleinas e pli che 2000 studentas e students. Tgeininas ein las qualitad principalas d’ina tala persuna? «Jeu sun in carstgaun cun marveglias, dapertut vi jeu saver ed emprender. Il medem mument sto tut esser structurau, e tener uorden ei il principal per mei», descriva el sesez. Ch’el ei ina persuna ambiziusa snega Arno Arpagaus buc. Per realisar ils projects ed encurir sligiaziuns ha el giu da separticipar e menar numerusas sesidas, uatgas e conferenzas. Vuler tener enta maun tuttas hottas e manischar persuls la carrotscha seigi denton mai stau sia finamira, puntuescha el.

Ina bloccada e trumpada

El hagi giu buna glieud entuorn el e quater tochen tschun sesidas ad onn hagien tuschiu per reglar las fatschentas dalla secziun, conceda Arno Arpagaus. El raquenta d’in project tiel qual el ei sefidaus da sesez: «Cu jeu hai proponiu a mia suprastonza d’augmentar las taxas da pernotaziun per las camonas han mes collegas scurlau il tgau, quei caschuni grondas controversas e seigi fetg spinus e riscant», gi el. Ina analisa haveva mussau che las taxas eran memia bassas. La radunonza generala ha approbau la finala d’alzar quellas– senza cuntervusch. Ils arguments dil president han tunschiu da perschuader. Quella mesira rinforza la situaziun finanziala dalla secziun. Gl’onn 2024/25 siara il quen dallas camonas cun in gudogn da 93’000 francs. Igl ei in mussament dalla cuntinuitad ch’il president partent ha vuliu garantir. Terradas ha il suprem Terrian dil reminent era stuiu dumignar. El numna il project da renovaziun dalla camona da Maighels. Gl’atun 2019 eri tut semtgau: la radunonza generala haveva lubiu il credit da baghegiar da 2,4 milliuns francs, las lubientschas cantunalas eran sin meisa. «Ch’igl Uffeci federal digl ambient ha bloccau tut – perquei che la camona cunfinescha cun ina paliu – ei stau per mei ina greva trumpada». Sco Arno Arpagaus gi, ha el daferton dumignau quella. «Nus essan puspei sin buna via cun in project niev ed jeu sun perschuadius che quel sa vegnir realisaus», gi el per concluder siu engaschi per la secziun Péz Terri.