Finiu cun parcar senza limita da temps e taxa

In dils motivs principals che la vischnaunca da Trun regla ils fatgs da parcar ei il parcadi avon il center communal. Ils luverdis ei quel numnadamein stedi pleins pli che pleins. «Biaras e biars parcan lur auto leu per serender silsuenter alla staziun ch’ei gest ella vischinonza e carrar vinavon cul tren. Quei ei vegniu mender e mender, visitadras e visitaders dil center communal anflan praticamein buca pli in parcadi il di ora», di la canzlista communala Sandra Gautschi.

Parcadis surcargai

Spel parcadi avon il center communal ein era quels agl ur dalla via principala occupai stedi, ferton che quels agl ur dil vitg ein meins frequentai. Per differenziar denter parcadis el center dil vitg e quels ordeifer ei la vischnaunca da Trun sedecidida per in concept flexibel da limitas da parcar e taxas. Dus exempels: Sil parcadi dil center communal astga vegnir parcau gratuitamein duront ina mesura, silsuenter cuosta mintg’ura in franc. Sil parcadi dils plazs da tennis astga vegnir parcau gratuitamein tschun uras e silsuenter 40 raps per ura. «Tiels parcadis ch’ein buc el center dil vitg ed agl ur dalla via principala lein nus esser beinvulents, damai che nus havein leu negins problems cun plazs surcargai», di Sandra Gautschi. Ils 30 da november 2025 decida il suveran davart la lescha e l’ordinaziun da parcar. Il cussegl da vischnaunca ha approbau ils dus instrumentaris cun 14:0 vuschs.

Procurar per uorden

«La finamira principala dil niev concept da parcar ei da definir ina lescha ed in’ordinaziun che cuviera ils pli relevants basegns ellas differentas fracziuns duront la maioritad dil temps. La nova legislaziun duei risguardar il principi dil caschunader, esser favoreivla per indigens e duei haver vinavon minimalas consequenzas negativas per l’attractivitad dalla vischnaunca e pigl ambient. Ella duei purtar uorden.» Quei scrivan las autoritads communalas da Trun el messadi per mauns dalla votaziun dil pievel e Sandra Gautschi cumpletescha: «Ils davos onns han differentas vischnauncas ella regiun introduciu limitas e taxas da parcar. Nus havein constatau che quei ei necessari era tier nus.»

Gliesta cun 18 parcadis

Tenor la suprastonza communala ei la situaziun dils parcadis buca cuntenteivla: « Ei regia ina munconza da parcadis publics en singuls loghens, las reglas sils parcadis publics san buca vegnir exequidas ed ei vegn per part parcau en vias da quatier e sin terren communal ch’ei buca previus per parcar.» Tenor la lescha da parcar approbada ils 12 da fevrer 2017 sa in e scadin parcar siu vehichel gratuitamein duront 48 uras ina suenter l’autra sin in parcadi public. «Cunquei ch’igl ei buca bein controllabel tgi che parca pli ditg che 48 uras ni regularmein, ei la lescha actuala buca praticabla. Las disposiziuns necessarias dalla Polizia cantunala sco era las signalisaziuns mauncan», scriva l’executiva el messadi per la votaziun. Silla gliesta dall’ordinaziun che vegn en votaziun figureschan 18 parcadis. La suprastonza communala puntuescha el messadi: «Igl ei buca la finamira da recaltgar aschi bia daners cullas taxas da parcar sco pusseivel, mobein da reglar cul temps gratuit e culla taxa per ura ina buna repartiziun dils vehichels.»

Reglau mintga parcadi

Tenor il messadi da votaziun ha la Polizia cantunala dau glisch verda alla nova legislaziun. «Enten realisar nies concept havein nus collaborau culla Polizia cantunala, aschia che la disposiziun da lezza vart ei mo pli da natira formala», di Sandra Gautschi. Accepta il pievel la lescha e l’ordinaziun da parcar, duein ils scamonds vegnir publicai e la signalisaziun semtgada. Encunter ils scamonds da parcar che vegnan allura publicai ufficialmein, vegnan vischinas e vischins aunc a saver recuorer.

Credit persuenter ei approbaus

Sin fundament dalla disposiziun dalla Polizia cantunala e las signalisaziuns necessarias san las controllas dils parcadis vegnir exequidas. Tenor la suprastonza communala duei quei succeder entras ina fatschenta externa ni entras in collaboratur dalla vischnaunca cun scolaziun adequata. L’ordinaziun tier la lescha preveda multas els cass da surpassaments. Il credit per metter en vigur il niev uorden da parcar ei vegnius concedius en rama dil preventiv 2025. Tut en tut ein ils cuosts calculai cun 92 000 francs.