Ils cavacristallas da Tujetsch relatan da lur pissiun
Sonda, ils 15 da november 2025 envida TujetschVivaCultura ad ina sentupada cun cavacristallas indigens. En fuorma da filmets vegn dau in sguard davos las culissas dad els.
«Historia e historias entuorn la cultura dils cavacristallas.» Quei tetel porta la scuntrada da sonda, ils 15 da november 2025 allas 19.00 el Museum La Truaisch a Sedrun. Commembers dall’Uniun Cristal Tujetsch relatan da lur pissiun. «Cavar cristallas ei ina essenziala part dalla cultura tuatschina. Cristallas en variaziuns multifaras san vegnir admiradas en bia localitads publicas e l’exposiziun el Museum La Truaisch muossa scuvretgas brigliantas dils cavacrappa indigens», scriva TujetschVivaCultura en si’invitaziun alla scuntrada.
La pissiun dils cavacristallas
El center dalla scuntrada da sonda stat la pratica dils cavacristallas. Sut tgei circumstanzias vegnan las cristallas ed ils minerals anflai? Co enqueran ni anflan ins insumma fuorns? Tenor tgei leschas nunscrettas e screttas funcziuna la «cuminonza dils cavacrappa»? Tgeinina ei la fascinaziun dil cavar cristallas? Quellas ed ulteriuras damondas vegnan dilucidadas da commembers dall’Uniun Cristal Tujetsch. Cun agid da filmets han els reteniu plaschers e suffrientschas duront la stad vargada. «Ussa savein nus dar in’egliada davos las culissas dil mintgadi d’in cavacrappa e guder la premiera da quella schelta cineasta», scriva TujetschVivaCultura. Ultra da quei duein discuors dar ina pli profund’egliada ella lavur dils cavacristallas. Ina viseta dall’exposiziun el museum cun guida versada terminescha il program, medemamein in viva. La sentupada vegn moderada da Gieri Venzin.
Gust da leger dapli?