Lai ha ussa la pli moderna
La pli moderna filiala da posta dal Grischun sa chatta dapi quest’emna a Lai. Suenter plirs mais da lavurs da renovaziun han represchentants da la Posta e da la vischnanca Vaz inaugurà e preschentà mardi avantmezdi las innovaziuns postalas. Tranter quellas è cunzunt il spurtegl digital fruntà sin grond interess.
Igl è in novum en il Grischun: sco emprima filiala da posta grischuna ha quella a Lai in spurtegl digital cun in servetsch via video. «I n’è dentant nagina intelligenza artifiziala», sco che Martin Derungs ha punctuà, «mabain ina persuna fisica che fa il servetsch a distanza via in monitur.» Il mainasquadra da la regiun Tusaun / Glion ha dastgà preschentar mardi avantmezdi la filiala renovada a radund 20 giasts. Intgins da quels han alura gist fatg l’emprova da la nova purschida.
E pelvair, il nov spurtegl digital collia ils clients cun ina u in emploià da la Posta che fa ses servetsch pli u main sco usità – ma simplamain via video. En quest cas èsi stà la dunna Popadić che ha gidà a la clientella da consegnar brevs e pacs. «Jau lavur grad da chasa anora, ma poss era far quai en la filiala a Berna», ha ella explitgà. Concret vul quai dir ch’ella sustegna clientas e clients tut tenor basegn: al nov spurtegl digital pon ins numnadamain era persequitar sias spediziuns, dumandar ses register penal, sviar la posta, communitgar ina midada d’adressa ed era simplamain dar in resun.
In spurtegl digital ed in fisic
«Las clientas ed ils clients decidan sezs, sch’els vulan far diever da la nova purschida u betg», ha dentant Martin Derungs ditg. Tgi che vul possia anc adina ir al spurtegl fisic. Cura che quel è occupà, saja il spurtegl digital dentant in’alternativa svelta e confurma al temp: «La glieud liquidescha bleras fatschentas direct online ed adina pli paucs vegnan en la filiala da posta. Damai na fai nagin senn pli d’avair trais spurtegls sco pli baud», uschia Martin Derungs envers la FMR.
E quai ha era Thomas Schifferle, il responsabel per la communicaziun da la Posta en la Svizra Orientala, confermà: «La posta sto sa sviluppar vinavant e s’adattar al temp. Perquai modernisain nus nossa purschida e guardain, tge ch’è tut pussibel cun novas tecnologias per ademplir noss servetsch public.» I saja quai ina part da la strategia da la Posta 2025 – 2028 (guarda box) ed il spurtegl digital ina tala novaziun ch’ins possia anc sviluppar vinavant: «Actualmain fan las emploiadas ed ils emploiadas il servetsch a distanza en las linguas ch’els discurran. Ma en l’avegnir pon ins forsa integrar translaziuns automaticas.»
Impurtant saja dentant vinavant la cussegliaziun persunala, uschia Thomas Schifferle: «Perquai essan nus ans decidì per il servetsch cun persunas a distanza e betg per ina intelligenza artifiziala u insatge sumegliant.» Per tgi che vul evitar il contact persunal, dettia tuttina gia vias da far quai.
Er in nov servetsch per pacs
Il spurtetgl digital n’è entant betg la suletta novaziun en la filiala renovada a Lai. Da nov dispona quella numnadamain era d’in autoservetsch per pacs. Qua po la clientella consegnar pacs prefrancads senza stuair consultar il spurtegl. Ed era la purschida per bagascha saja sa megliurada e pli flexibla grazia a la renovaziun, uschia Richard Metzler, il manader da la rait da filialas grischuna: «En sasez è be pli l’adressa la medema. Uschiglio è la filiala pli bella, pli clera ed era pli digitala.»
Cun las novaziuns veglian ins en emprima lingia ademplir ils basegns moderns – ma era mussar ch’ins è persvas da l’avegnir da talas filialas da posta. Sche la nova purschida cun spurtegls digitals chatta accoglientscha, sto dentant anc sa mussar. Igl è numnadamain anc in project da pilot: en Svizra datti anc ussa pir radund diesch spurtegls cun servetsch via video.
«La Posta da damaun»
Cun la finamira da pudair s’adattar a las cundiziuns che sa midan cuntinuadamain ha la Posta sviluppà l’onn 2020 la strategia «La Posta da damaun». Quai vul pia era dir ch’ella sto tegnair pass cun la digitalisaziun. Dentant betg mo, la posta duai porscher servetsch fisics sco era digitals e – sco ch’ins po leger sin la pagina d’internet da la Posta – simplamain facilitar il mintgadi a la glieud. E per far quai dovri investiziuns, sco ch’il responsabel per la communicaziun da la Posta en la Svizra Orientala Thomas Schifferle ha ditg envers la FMR: «La Posta investescha per la perioda 2025 – 2028 var 100 milliuns francs en la modernisaziun da la rait da filialas.»
Ina fatschenta da la Confederaziun
La Posta na definescha dentant betg independentamain sia strategia. Quella s’orientescha numnadamain a las finamiras ch’il Cussegl federal la propona mintga quatter onns en il num da la Confederaziun, la proprietaria da la Posta. Per la perioda 2025 – 2028 ha il Cussegl federal per exempel proponì da far pitschnas adattaziuns en connex cun la persistenza, novs secturs da fatschenta ed acquists d’interpresas. Uschiglio saja il Cussegl federal cuntent cun la lavur da la Posta. Quella haja dumagnà bain las sfidas dals ultims quatter onns, sco che la Confederaziun ha scrit en ina communicaziun dals 29 da schaner 2025 sin sia pagina d’internet.
Gust da leger dapli?