Lectura rumantscha

Per Lai, Glion e Trun – e per posta, pops e parcadis vai en la Lectura Rumantscha dad oz.

Lai: in «video-call» cun ina gidantra

100 milliuns francs – tant investescha la Posta Svizra ils proxims onns per modernisar tut sias filialas. Profità da questa modernisaziun ha era ina filiala grischuna, quella da Lai. Via monitur èsi ussa pussaivel da dar si a Lai pachets e dumandar per sustegn. La gidantra u il gidanter dal «video-call» sesa x-insanua en Svizra en in biro da la Posta. U forsa perfin en il homeoffice en ina chasa da vacanzas a Lai?

Glion: cun u senza pops?

Var 120 pops ad onn naschan en il spital a Glion. Quai è pauc, e perquai vegni adina puspè discutà da serrar la partiziun da parturir dal Spital regiunal Surselva. Ils delegads e las delegadas da la SanaSurselva – l’uniun purtadra da l’ospital – han decidì quest mardi da vulair dar dapli temp per chattar ina soluziun per mantegnair quella partiziun da naschientschas. Il redactur Martin Gabriel metta a lieu la decisiun «cun u senza pops».

Trun: far urden cun ils parcadis

Enfin ussa regiva l’anarchia sin ils 18 parcadis publics e gratuits a Trun! Has er ti forsa gia parcà là gratuitamain tes auto – mo per suenter viagiar vinavant cun il tren? U has forsa era ti laschà tes auto plirs dis sper la chasa communala u sper il Museum Cuort Ligia Grischa»? – Ussa vala a Trun: «Finito gratuito!» La vischnanca vul introducir in urden da parcar – e far pajar per parcar.

Bun divertiment cun la Lectura Rumantscha!