Pli che 80 stans d’advent

Il temps d’advent s’avischina cun passuns: In’occurrenza ch’ei dapi onns adina cumbinada cun quel ei la fiera d’advent a Glion. Mintgamai la sonda avon l’emprema dallas quater dumengias organiseschan l’Uniun da commerci e mistregn Glion e contuorn e l’Uniun fiera jamnila Glion quella. Uonn per la 27avla gada. Sco quei che omisduas communicheschan ein varga 80 stans s’annunziai. Quels presentan rauba e vivonda pil temps festiv. Denton buca mo candeilas, artechels da schenghetg, biscuits e figuras dalla stalla. La fiera d’advent da Glion envida era da s’entupar e guder in migiel punsch ni vin cauld amiez la fuola da glieud. Bia glieud vesa quella fiera regiunala a Glion sco alternativa tier in viadi el lontan, ad ina fiera d’advent en in marcau grond zanua ordeifer la Svizra. Alla fiera d’advent a Glion vegn Sontgaclau a cumparer ed il suentermiezgi dat ein producziuns dil «Städtli-Chor». Lu han visitaders caschun da separticipar allas 16.30 ad in cant aviert ella baselgia catolica. (fmr/abc)