Taxas da turissem en mira
La radunonza communala da Tujetsch ha acceptau il preventiv 2026 la mesjamna sera. Il budget dil quen da gudogn e sperdita preveda ina sviulta da 16,7 milliuns francs cun in pign gudogn. Vischinas e vischins ein suandai la proposta dalla suprastonza communala da reducir il pei da taglia da 95 sin 90 %. En mira han las autoritads communalas da Tujetsch las taxas da turissem. Quellas cuvieran per dabia buc ils cuosts.
En vesta alla radunonza communala dil preventiv 2026 la mesjamna sera ella Sala Cristalla a Sedrun ha la suprastonza communala da Tujetsch presentau in messadi fetg detagliau. En quel ha ella dilucidau surtut ils fastedis cumbinai cullas expensas carschentas. In management dallas expensas e cun ellas dallas investiziuns ei necessaris per tener las hottas finanzialas enta maun.
Preventiv ulivau
Il preventiv dil quen da gudogn e sperdita pigl onn vegnent quenta cun ina sviulta da 16,7 milliuns francs. Severificheschan las cefras indicadas el budget, duess la vischnaunca s’avanzar finanzialmein per 12 400 francs. Las investiziuns previdas igl onn vegnent muntan rodund 5,3 milliuns francs, netto 3,9 milliuns francs. En special preveda il plan d’investiziuns la projectaziun dalla sanaziun dalla Scola Sedrun, la plazza da giugs Drun, il niev parc da freestyle Dulezi sco era il remplazzament dil scaldament a Drun. Leutier vegnan projects dall’infrastructura da basa. Vischinas e vischins han acceptau il peventiv 2026 ed il medem mument la reducziun dil pei da taglia da 95 sin 90 %. Quella reducziun per tschun pertschien caschuna meins entradas da 100 000 entochen 130 000 francs.
Taxas da turissem en mira
Sco ins sa leger el messadi dalla suprastonza communala per mauns dalla radunonza communala caschunan differents secturs fastedis. «La situaziun finanziala dalla vischnaunca da Tujetsch ei buna. Tonaton stuein nus haver en mira surtut ils cuosts per sanadad e turissem e far remeduras tscheu e leu.» Quei ha il president communal Martin Cavegn detg alla FMR. Il surpli da cuosts per infrastructura turistica importa 1,2 milliuns francs. Dapi l’introducziun dalla lescha davart la taxa da hosps e la taxa da turissem igl onn 2015, ei la taxa fundamentala da hosps mai vegnida adattada – ni alla situaziun dalla purschida turistica ni alla carischia. «Igl emprem quartal da l’auter onn vegnin nus a tematisar concretamein in alzament dallas taxas ensemen culla vischnaunca da Mustér. La finamira ei da haver ina soluziun acceptada dallas duas vischnauncas entochen miez digl onn 2026», di Martin Cavegn.
Confidonza els delegai
«Ils cuosts da sanadad e dallas ovras socialas creschan ad in crescher», scriva la suprastonza communala el messadi alla radunonza da vischnaunca. Quei tuna dramatic, mo Martin Cavegn relativescha: «Nus havein confidonza cumpleina els representants e delegai dalla Sana Surselva. Tonaton stuein nus tener en egl quei sectur e tenor circumstanzias reagir.» Igl onn 2026 duessi ei dar enqual decisiun sin plaun regiunal per migliurar quella situaziun finanziala.
Differenziar las investiziuns
«Entochen igl onn 2025 vegnevan las investiziuns previdas el budget d’investiziun realisadas igl onn sissu. La suprastonza communala ha decidiu da parter las investiziuns en investiziuns necessarias ed investiziuns giavischeivlas», scriva la suprastonza communal el messadi. Tenor Martin Cavegn vul quei dir: «Primavera vesin nus con buns ch’il quen 2025 ei staus. Sin fundament da quel vegnin nus a decider, schebein ils projects dil parc da freestyle a Sedrun/Dulezi e la plazza da giug a Sedrun/Drun vegnan realisai ni buc igl onn 2026.» La plazza da giug a Drun ei calculada cun cuosts da 950 000 francs, il parc da freestyle a Dulezi cun in’investiziun da 800 000 francs. Investiziuns stoppien adina vegnir fatgas el rom dallas pusseivladads finanzialas dalla vischnaunca risguardond il plan da finanzas e las investiziuns pils proxims 15 onns.
Gust da leger dapli?