Lectura rumantscha

La Lectura Rumantscha furnescha sco adina novitads localas: dal chaplut dad Uors che vegn spustà, dad in campiunadi da giabus a Sumvitg e dad in contract vegl che fa rumpatesta en il Grischun Central.

Uors: In chaplut va sin viadi

Has ti schon ina giada pudì observar, co ch’in pitschen chaplut vegn spustà dad in lieu a l’auter? Il redactur ­Augustin Beeli ha gì quest cletg la gievgia avantmezdi – e documentà questa dischlocaziun en ses artitgel. Ina crana ha transportà il chaplut inclusiv ina statuetta da Nossadunna en ses nov lieu da destin.

In contract che fa rumpatesta en Valragn

Savevas ti, che las staziuns da chargiar autos electrics dovran lingias d’electricitad vaira fermas? La corporaziun da vischnancas Rain Posteriur e las ovras electricas sa dispitan dapi quatter onns avant dretgira, tgi che duai surprender ils custs per questas lingias pli fermas. E la raschun è in contract dals onns 1950! Tenor quel contract stuessan las ovras pajar, ma quellas sa dostan cun pes e mauns.

In giabus monstrus a Sumvitg

Aua e grascha – nagut auter. Quai è il recept per far crescher giabus en Surselva! Almain tenor Giusep Cajacob, che ha cun ses giabus monstrus gudagnà ils «campiunadis-sursilvans-da-tgi-che-ha-il-pli-grond-giabus». Nus gratulain e giavischain: bun appetit!

Bun divertiment cun la Lectura Rumantscha!