Il NA en l’Engiadin’Ota ha era consequenzas en il sid

Ils abitants e las abitantas da la Bregaglia e dal Puschlav han persequità sco observaders externs la votaziun davart il destin da l’Ospital Engiadin’Ota. Davart il futur decidan numnadamain las 11 vischnancas da l’Engiadin’Ota. Trais dad ellas han gia refusà il credit per la sanaziun da l’ospital ils 4 da november, uschia ch’il credit è giu da maisa, cunquai che tuttas vischnancas avessan stuì conceder il credit. 

Discurs en il Puschlav

Curt suenter la decisiun en l’Engiadin’Ota èn las persunas responsablas dal Center da sanadad Puschlav s’inscuntradas cun represchentants da l’Ospital chantunal a Cuira. Igl è mo in dals emprims discurs ch’il center da sanadad vegn a manar las proximas emnas. «Nus vulain vegnir integrads activamain en ils proxims pass, perquai che mintga decisiun vegn ad avair consequenzas per noss center», ha declerà Fabiola Monigatti, la presidenta dal cussegl da fundaziun dal Center da sanadad Puschlav, a l’agentura da novitads Keystone-SDA.

Actualmain ha il center da sanadad quatter cunvegnas da prestaziun cun l’ospital a Samedan, numnadamain per ils secturs cardiologia, radiologia, ginecologia e medischina d’uffants. Regularmain van spezialistas e spezialists da Samedan en il Puschlav per examinar e cussegliar pazientas e pazients. «Nus avain cunvegnas cun l’Engiadin’Ota e quellas ston vegnir respectadas», ha ditg Fabiola Monigatti.

Naginas midadas en la Bregaglia

Era la cumissiun administrativa dal Center da sanadad Bregaglia ha discutà l’emna passada davart l’avegnir intschert da l’ospital regiunal a Samedan. «Ord vista da manaschi, basegn e strategia na sa mida per nus nagut», ha declerà il president da la cumissiun, Maurizio Michael, vers Keystone-SDA.

Il Center da sanadad Bregaglia n’ha naginas cunvegnas da prestaziun cun Samedan sco il center en il Puschlav. «L’impurtanza dal provediment da sanadad tras Samedan è dentant incontestada», ha manegià Maurizio Michael.

Partiziun da parturir sto restar

Per il Center da sanadad Puschlav èsi en emprima lingia la finamira da mantegnair las prestaziuns che vegnan purschidas fin uss e da garantir la vischinanza dals servetschs da sanadad. Da Poschiavo fin a Samedan èsi 27 kilometers. Sche las relaziuns da vias èn bunas, dura il viadi circa 45 minutas. Questa vischinanza è impurtanta cunzunt per naschientschas. Dapi tschintg onns è il Puschlav dependent da Samedan per pagliolas. «Igl è impurtant che questa partiziun restia en l’Engiadina», ha punctuà Fabiola Monigatti.

Er en la Bregaglia, 42 kilometers davent da Samedan, èn las naschientschas in tema. «Las vischnancas da l’Engiadin’Ota vegnan a surpigliar la finanziaziun da la partiziun da parturir», è Maurizio Michael persvadì. Ellas giajan gia vers empermischuns concretas.

Trair a niz las schanzas

Malgrà las difficultads actualas vesa Fabiola Monigatti era schanzas. «Nossa strategia da collavuraziun ha success. Igl è vegnì punctuà pliras giadas che nus sajan in exempel per il chantun. Forsa pudain nus svegliar questas enconuschientschas er en la regiun da l’Engiadin’Ota», ha ditg Fabiola Monigatti. 

Il terratrembel da sanadad en Engiadin’Ota na vegn tenor Maurizio Michael betg a restar senza consequenzas. «La strategia che vegn elavurada actualmain sin plaun chantunal vegn a resguardar quests svilups per l’avegnir da la purschida chantunala da sanadad.»