Tancar forza da cuminonza

Igl avonmiezdi ein las trenta participontas e participonts (umens e dunnas e vegls e giuvens) stai sin viadi en quater localitads claustralas. En mintga local ein ellas ed els vegni confruntai cun ina nova tematica da reflexiun. «Igl ei stau ina buna occurrenza cun quels quater posts», ha Isabelle Defuns-Gamboni da Trun che fa part ensemen cun frater Martin Hiernonymi dalla claustra da Mustér dalla suprastonza dil Cussegl pastoral cantunal detg. «Jeu mezza sun fetg satisfatga e cuntenta ed jeu haiel era udiu dallas participontas e dils participonts mo buns resuns.» Egl emprem dils quater posts hai dau la pusseivladad da s’’occupar dalla veta cun tut ses aspects ensemen cun tuttas creatiras dil mund. El secund local ei vegniu reflectau davart la relaziun cun Diu, en in tierz liug davart la via dada da Jesus Christus. Ed alla fin hai giu num «Il Sogn spért regala speronza, confiert e curascha».

Sin via sco pelegrin

Bernhard Bislin da Sagogn ei il president actual dil Cussegl pastoral dil Grischun. «Jeu haiel accumpignau il pelegrinadi en claustra cun ina pintga distanza, perquei ch’jeu haiel fotografau. Mo a mi ha l’entira admosfera da quei ch’ei succediu en ils quater posts fatg gronda impressiun.» Ad el hagien las differentas tematicas dil pelegrinadi imponiu specialmein. «Il pli impressiunont mument per mei ei stau cura che nus eran el sectur dil chor dalla baselgia claustrala ed igl ei vegniu ord il stgir adina pli e pli illuminau.» Quei hagi dau ad el inspiraziun bunamein en fuorma d’in resvegl, ha Bernhard Bislin detg en sia retrospectiva persunala dil pelegrinadi.

Far oraziun culs peis

«Pelegrinar ei urar culs peis.» Quels plaids ha il president dil Cussegl pastoral cantunal legiu en in liug sco anteriur absolvent dalla via da sogn Giacun. Leu hagi el savens giu l’impressiun da daventar spirtalmein pli e pli vits cun ir liungs tschancuns a pei. Mo en quei mument ch’ins sesvidi daventi ins era pli aviarts ed accessibels. «Per mei ei quella aviartadad spirtala stada  ina gronda enrihida sco pelegrin silla via da Sogn Giacun», ha Bernhard Bislin detg.

Reflectar avon igl Advent

L’occurrenza da pelegrinadi che ha giu liug per l’emprema gada a Mustér ei tenor il president dil Cussegl pastoral cantunal vegnida organisada aposta duas jamnas avon igl Advent. E quei per dar la caschun allas participontas ed als participonts da sepreparar pigl Advent cun reflexiun e meditaziun. «Nus havein vuliu metter in accent per saver s’occupar culla tematica , ina tematica actuala egl onn sogn. Quei han Isabelle Defuns-Gamboni e Bernhard Bislin detg. «Nus havein integrau sapientivamein muments da quietezia e da meditaziun sin nies viadi. Igl ei enzatgei bi da meditar da cuminonza en ina gruppa.»

Interprender e tancar forzas

La sora dominicana Monika Hüppi dalla claustra da Glion ha accentuau la cuminonza en sia bilanza dil pelegrinadi da sonda vargada. «La cuminonza munta ina gronda enrihida per mei. Ed jeu apprezieschel fetg che nus essan stai persunas dall’entira Surselva ch’ein sentupadas per far il viadi cumineivel.» Resuns semeglionts hai era dau d’autras participontas e participonts dil pelegrinadi claustral. Duas dunnas surmiranas han detg enviers la FMR ch’ellas tuornien a casa cun novas forzas.

In’occurenza appreziada

L’occurrenza da reflexiun dil Cussegl pastoral cantunal en Surselva ha liug gia dapi zacons onns. Entochen dacheu haveva quella liug a Glion. Uonn ein ins ius a Mustér per dar la caschun allas participontas ed als participonts da sissum la Surselva d’haver in viadi pli cuort. Sco quei che Isabelle Defuns-Gamboni ha detg enviers la FMR vegni la glieud da sissum entochen giudem la Surselva ed era dalla Val Lumnezia. Perquei prevedi ins da far igl onn proxim in di da reflexiun eventualmein en Lumnezia. «Uonn havein nus per l’emprema gada era giu dus giuvens che han priu part da nossa occurrenza. Cun marcar preschientscha en tuttas regiuns dalla Surselva survegnin nus ins forsa aunc ulteriurs giuvens participonts.»