La carta dad aur carmala

Ella vischnaunca da Sumvitg seregheglia il giavisch da separticipar alla Golden Card, la carta dad aur lantschada dallas vischnauncas da Mustér, Tujetsch, Andermatt, Hospental e Realp. Ina carta introducida la primavera 2025 che lubescha a persunas cun sedia permanenta en ina dallas vischnauncas da nezegiar ina vasta purschida turistica, culturala e dil temps liber. Cun la Golden Card che cuosta per persunas carschidas 333 francs san ins ir duront igl entir onn cun las pendicularas dad Andermatt, Sedrun e Mustér e duront il temps d’unviern cun la Viafier Matterhorn/Gotthard denter Mustér ed Andermatt. Ils possessurs dalla Golden Card han access al Bogn Sedrun ni al Center Fontauna per numnar sulet in pèr dallas purschidas che sesanflan da domaduas varts dil Pass Alpsu.

Muentar enzatgei

Ella vischnaunca da Sumvitg ei vegnida lantschada ils diesch da november 2025 ina petiziun drizzada al president communal Patrick Schaniel. Lezza giavischa d’eruir las pusseivladads dalla vischnaunca da Sumvitg da separticipar alla Golden Card. Ils iniziants dalla petiziun ein numnadamein dil meini che convischinas e convischins da Sumvitg savessien profitar dalla Golden Card sco quei ch’ins sa leger el text dalla petiziun lantschada online. Ils petiziunaris vesan la purschida dalla Golden Card sco gronda schanza per render pli attractiva la regiun. «Mo ensemen cun nossas vischnauncas vischinontas savein nus muentar enzatgei per nies futur.»

Entochen ier, ils 17 da november 2025 avonmiezgi era l’Uniun da cultura e sport da Cumpadials aunc menziunada silla pagina dad openPetition sco instituziun responsabla per la petiziun en favur dalla Golden Card. Il president dalla Uniun da cultura e sport da Cumpadials, Samuel Degonda ha denton tschintschau sin damonda dalla FMR dad in sbagl. El ha getg che ni el ni l’uniun hagien lantschau la petiziun. «Nus essan sulet vegni dumandai, sche nus seigien promts da sustener la petiziun.» Samuel Degonda ha tschintschau dad in comité responsabel aschia che l’Uniun da sport e cultura da Cumpadials ei era svanida el decuors dil gi dalla pagina. Da niev anflan ins leu il num da Jonathan Wieland che segna sco responsabel per la petiziun.

In mied democratic legitim

Il president communal da Sumvitg, Patrick Schaniel ha gia udiu dalla petiziun lantschada en vischnaunca en favur dalla Golden Card. «Contact cun ils iniziants da quella petiziun havein nus dalla vischnaunca entochen ussa giu negin.» Il president communal discuora dad in dretg democratic legitim dad inoltrar petiziuns. «Nus vegnin segiramein a sediscuorer cun ils petiziunaris, aschilunsch che la petiziun vegn la finala era inoltrada.»

Entochen ils 17 da november 2025 han 136 persunas suttascret la petiziun che ha la finamira da rimnar silmeins 250 suttascripziuns entochen la fin digl onn. Il president communal gi che la suprastonza seigi gia dad ella anora sefatschentada cun semegliontas damondas sco quella che la petiziun plidenta. «Independentamein dalla petiziun vegnin nus a dar plaid e fatg en caussa alla proxima radunonza communala dil december.» Denter auter vul il president communal era far attent alla atgna purschida. Dapi l’entschatta digl onn 2024 paga la vischnaunca a mintga affon e giuvenil entochen 20 onns sesents en vischnaunca 300 francs en favur da sias activitads sportivas. Igl interess per quella purschida ei la finala buca staus aschi gronds sco quei che la vischnaunca ha atgnamein quintau.

Fasa da pilot

Il president communal da Tujetsch, Martin Cavegn ha gia udiu dalla petiziun lantschada a Sumvitg. Ed el ha era giu contact cun ina gruppa ord la Val Medel che ha medemamein exprimiu il giavisch da separticipar alla Golden Card. Gronda speronza dad engrondir il radius dalla carta dad aur sin las vischnauncas vischinontas fa Martin Cavegn silmeins pil mument buc. «Nus savein aunc sezs buca propi nua che nus stein.» El ha fatg attent alla fasa da pilot da treis onns che las vischnauncas involvadas han definiu per la Golden Card. Suenter quels treis onns vulan las vischnauncas e lur partenaris far bilanza per decider da cuntinuar cun la carta dad aur ni buc. La basa principala per insumma lantschar la Golden Card ein tenor las explicaziuns da Martin Cavegn las pendicularas dad Andermatt/Sedrun colligiadas via ina cuminonza da tariffas cun las pendicularas da Mustér.