Lectura Rumantscha

Bainvegni ad ina nova Lectura Rumantscha che stat, tge casualitad, sut l’ensaina da l’arrivada e dal bainvegni en differents munds. Igl è quasi in pre-advent mez il mais da november.

Bainvegni en il mund rumantsch

Sch’ins va a star en in auter lieu, survegn ins ina massa infurmaziuns da la vischnanca: Nua èsi da dismetter il rument? Co è la scola organisada? – Da nov datti en vischnancas rumantschas er infurmaziuns davart la lingua rumantscha, sco per exempel davart curs da rumantsch. Quel uschenumnà Check-in rumantsch ha la Lia Rumantscha creà.

Bainvegni sin quel mund

La populaziun dal Puschlav vul vinavant beneventar novnaschids en sia vallada. Perquai fa ella il viadi sur il Pass dal Bernina en l’ospital a Samedan che responsabel per tscherts servetschs da provediment da sanadad per la vallada taliana. Ma tge capita cun ils pitschens, sche l’Ospital Engiadin’Ota avess forsa da serrar sias portas suenter il naufragi da’l credit a l’urna? Il Puschlav è plain speranza che la partiziun da parturir vegnia a restar a Samedan, cunquai ch’el haja era cunvegnas cun l’ospital.

Bainvegni en in auter mund

Dapi quest atun ha l’areal da Steinsberg sur Ardez in portal da fier en stil medieval. El envida visitadras e visitaders en in mund d’antruras cun ils mirs da la ruina Steins­berg. Il portal duai dentant surtut far attent a las novas reglas da cumportament che valan sin quel areal per proteger ils mirs istorics.

A revair e bun divertiment cun la Lectura Rumantscha!