«Redweek» – in accent en favur dils cristians persequitai

Dils 15 entochen ils 23 da november 2025 sclarescha il baghetg dalla claustra a Mustér en colur cotschna. Cun quell’acziun dat la claustra in accent en favur dils cristians che vegnan persequitai sigl entir mund. L’jamna cotschna «Redweek» ei in’acziun che l’organisaziun Baselgia en pitgiras ha instradau avon diesch onns. En biaras tiaras vegn fatg attents silla problematica dils cristians che vegnan persequitai sigl entir mund. Sco quei che la claustra da Mustér scriva en ina communicaziun als mieds da massa, ei quella problematica era vegnida tematisada la dumengia vargada el survetsch divin.

350 milliuns cristians vegnan persequitau e discriminai dapresent sin quest mund. «Quei ei in diember inimaginabel, mo tuttina interessescha quei strusch enzatgi», ha pader Bruno Rieder, il decan dalla claustra, detg en siu priedi. Culla colur cotschna duei vegnir significau il mazzament da biaras cristianas e biars cristians sin quest mund. El center da «Redweek» stattan informaziuns, oraziuns ed agid concret pils cristians persequitai. Igl onn vargau ein varga 150 pleivs en Svizra separticipadas all’acziun. Uonn spetgan ils organisaturs ina participaziun aunc pli gronda.