Sgarschur en in vitg muntagnard grischun

In gieu electronic da horror na stat segiramain betg a cor a mintgina e mintgin. Probabel perquai ch’ins patratga immediat vi dad uschenumnads «jumpscares», pia ch’ins vegn starmentà uschè fitg ch’ins siglia gist giu da la sutga.

Tar il gieu electronic «Mundaun» ch’è cumparì l’onn 2021 èsi dentant auter. Là è manegià cun horror plitost la malsegirtad ch’ins senta durant giugar e l’atmosfera inquietanta che regia en questa vischnanca alpina che sa numna medem sco il gieu. Interessant n’è dentant betg mo il gener da horror, mabain surtut las ingredienzas grischunas ch’èn integradas en il gieu.

«Mundaun» è vegnì sviluppà da l’artist e designer da gieus Michel Ziegler da Son Gagl che ha creà quasi sulet l’entir gieu. Il stil visual dat en egl: Tut las texturas èn vegnidas dissegnadas cun rispli a maun. Il giugader e la giugadra va en la rolla da Curdin che turna suenter la mort misteriusa da ses tat en sia vischnanca natala. Là scuvra el secrets sombers, inscuntra creatiras da ditgas alpinas e sto sa confruntar cun sias atgnas temas.

Sper l’atmosfera spessa impressiunescha «Mundaun» era grazia a sia autenticitad culturala: La glieud discurra rumantsch e blers settings e legendas sa basan sin lieus ed istorgias realas cunzunt or da la Surselva. Uschia n’è il gieu betg mo ina aventura snuaivla, mabain er in omagi a la cultura alpina dal Grischun. – Dapli na dastga dentant betg vegnir tradì. Il gieu è disponibel per 20 francs sin la plattafurma da gieus «Steam».