Tscharvè, cumpagnia e gervosa

Star da cumpagnia, dar ina baterlada rumantscha, giudair ina gervosa u in moctail ed er anc duvrar il tscharvè. Quai pon Rumantschas e Rumantschs da la Bassa far questa mesemna a l’uschenumnà Pubquiz Rumantsch a Berna. En gruppas da maximalmain ses persunas èsi da dar respostas a dumondas da savida generala. En trais rundas cumbattan las gruppas ina cunter l’autra.

Sco quiz-master è vegnì engaschà  il rappunz Ivo Orlik. Enfin uss èn nov gruppas s’annunziadas e cun quai saja il maximum da gruppas cuntanschì, declera Alina Müller a la FMR. «Ma ins po tuttina vegnir simplamain sperasvi e participar en gruppas che n’èn anc betg plainas.»

Quai che ha cumenzà sco idea durant il segund Creaton Rumantsch l’entschatta da quest onn a Berna è ussa vegnì realisà. Il comité d’organisaziun enturn Alina Müller, Chatrina Josty, Elena Luzio, Aluis Deragisch ed Ignaz Perez Prat ha elavurà in concept e mess enturn quel cun questa occurrenza a Berna gia per la segunda giada. L’emprim Pupquiz Rumantsch è stà a Cuira ils 15 da settember 2025 ed è stà in success.