600 onns Ligia Grischa a Trun en film e cudisch

Igl onn 2024 ha Trun festivau il giubileum da 600 onns Ligia Grischa tenor il motto «Sut igl Ischi 2024». 1424 era quella ligia numnadamein vegnida renovada a Trun. Arranschaments da musica, cant, teater ed exposiziuns sur igl entir onn ora han attratg bia glieud a Trun. Il program purschiu ei staus varionts ed interessants. Quater onns haveva in comite d’organisaziun cun pliras gruppas da lavur luvrau vid la fiasta. Il temps dallas preparativas e dallas presentaziuns ei vegnius documentaus ton en in film sco en in cudisch. La presentaziun da quels dus mieds ei sonda, ils 22 da november 2025 allas 19.00 el center communal a Trun.

Producziun audiovisuala

Beat Manetsch ha realisau ina retscha da filmets dalla fiasta e parallelmein era ina producziun audiovisuala. Quella vegn presentada sonda sera e muossa la glieud che ha giu ina funcziun ni l’autra surtut davos las culissas da quella fiasta. «Jeu sun sedaus breigia da registrar aschi biaras persunas sco pusseivel. Ei dat denton adina bunas olmas dretg e seniester ch’jeu hai forsa buca documentau», di Beat Manetsch. Ella persuna da Beat Manetsch ch’ei carschius si a Trun ha il comite d’organisaziun giu dau l’incarica per ina producziun audiovisuala ad in profi sin quei sectur. Rodund 40 onns ha el luvrau en differentas funcziuns tier RTR sco era tier SRF.

In cudisch

Tschiens ni probablamein mellis ga ha Lotar Tomaschett smaccau sil nuv da sia camera da fotografar duront la fiasta da 600 onns Ligia Grischa a Trun. 277 da quellas fotos ein vegnidas eligidas pil cudisch «Sut igl Ischi 2024 – 600 onns Ligia Grischa – Ina retrospectiva» ch’ei sortius dacuort dalla stamparia. Tuttas activitads dallas preparativas entochen l’avertura ed ils arranschaments ein vegnidas registradas en fuorma cronologica. Lotar Tomaschett ch’ei carschius si e viva e lavura a Trun ei seperfecziunaus a moda autodidactica el sectur dalla fotografia. Ils davos onns ein fotografias dad el – surtut dalla natira – stadas da veser ad exposiziuns ed ellas medias.