In container per il scalem superiur
A partir dil proxim onn da scola crescha il diember da scolaras e scolars che midan dil scalem primar el scalem superiur dalla scola dad Ilanz/Glion. In fenomen che cuoza pli probabel entochen igl onn da scola 2031/32. Per dumignar quei temps propona la suprastonza communala al parlament da cumprar in container d’instrucziun che porscha il plaz necessari supplementar. Il parlament decida a caschun dalla debatta da preventiv ils 26 da november 2025.
«Nua plazzar il provisori, ei aunc buca decidiu,» declara il canzlist dalla vischnaunca dad Ilanz/Glion, Michael Spescha. Ch’il scalem superiur dalla scola dad Ilanz/Glion ch’ei da casa el marcau da Glion drova dapli plaz, para ord vesta dalla vischnaunca dad esser clara caussa. E co scaffir dapli plaz per il scalem superiur ha la suprastonza communala decidiu l’entschatta november 2025, sco quei ch’ella ha communicau ils 7 da november 2025 via Fegl ufficial Surselva. «La suprastonza ei sedecidida da cumprar in container che porscha plaz supplementar per scolaras e scolars dil scalem superiur.»
Il proxim onn da scola
Tenor la veglia dalla suprastonza communala duei il container star a disposiziun al scalem superiur a partir dil proxim onn da scola 2026/27, sco quei che Michael Spescha confirmescha. El tschontscha dad ina decisiun da principi dalla suprastonza communala da cumprar e da buc affittar il provisori. «Diversas examinaziuns da nossa partiziun d’immobilias han mussau che la cumpra ei pli favoreivla visavi prender a tscheins, principalmein sch’il provisori vegn duvraus dapli che tschun onns.» Quei san ins leger el messadi che la suprastonza ha mess a disposiziun al parlament communal e ch’ei accessibels via la pagina dalla vischnaunca.
Part dil preventiv
La cumpra dil provisori da scola per il scalem superiur ei part dil preventiv communal per igl onn 2026. E quei preventiv tracta il parlament dad Ilanz/Glion a caschun da sia sesida dils 26 da november 2025. La vischnaunca ei numnadamein promta dad investir 200 000 francs per cumprar il container da scola cun l’opziun dad engrondir il provisori, sch’ei sto esser. Il basegns per dapli plaz ei per il menader dalla scola dad Ilanz/Glion, Gieri Tschuor daus neu dallas annadas pli fermas che midan ils proxims onns dil scalem primar el scalem superiur. «Naven dil proxim onn da scola duvrein nus plaz supplementar per ina classa.» Els proxims onns sa ei esser ch’il basegns da plaz crescha aunc per ina ni duas classas. «Definitiv savein nus quei mintgamai suenter ils examens d’admissiun dil gimnasi», gi Gieri Tschuor. Quels examens tradeschan la finala contas scolaras e cons scolars che frequentan il scalem superiur e cons che midan el pregimnasi en ina dallas scolas medias.
Diember da scolaras e scolars
Il messadi per mauns dil parlament communal indichescha il diember da scolaras e scolars che midan ils onns proxims dil scalem primar el scalem superiur dalla vischnanca dad Ilanz/Glion. Las indicaziuns ein fatgas senza las scolaras ed ils scolars che midan ella scola da talents ed el progimnasi. Ils onns vargai han en media biabein 30 scolaras e scolars midau mintg’onn dalla scola primara el scalem superiur. A partir digl onn da scola 2026/27 crescha quei diember en media sin 50 scolaras e scolars per contonscher igl onn da scola 2031/32 il punct culminont cun 54 scolaras e scolars. Suenter s’ulivescha il diember che mida dil scalem primar el superiur puspei sin 20 scolaras e scolars. Quei ei era il motiv che la vischnaunca vul ulivar la damonda per dapli spazi da scola cun in provisori.
Tgei ch’ella preveda da far cun il container d’instrucziun, sch’el ei puspei d’anvonz, tradescha il messadi per mauns dil parlament communal. En quei cass vul la vischnaunca puspei vender igl object. Ei dat segir enzanua en Svizra ina scola ni l’autra ch’ei temporarmein ellas stretgas cun il plaz d’instrucziun.
Gust da leger dapli?