«In mountainbiker sto aunc adina saver morder»
Ils 21 da settember 2025 ha Nino Schurter terminau ufficialmein sia carriera da mountainbiker professiunal. En quella disciplina sportiva eis el daventaus il meglier atlet da tut temps. Gl’onn 1994, sco buob dad otg onns, ha el entschiet quella carriera unica – alla cuorsa dil kilometer a Schluein. Quei ha el confirmau ell’intervesta culla FMR.
Gitg ha la FMR stuiu spitgar. Trasora ha siu biro GFS Sports Management da Cuera stuschau il termin. Quei termin mondi buca, l’auter era buc, Nino Schurter seigi memia occupaus. Cuort suenter la davosa cuorsa dils 21 da settember 2025, ei il management s’annunziaus. Ussa hagi el peda. E quei ei stau dus meins pli tard, gliendisgis, ils 17 da november. Aschia eis ei stau pusseivel da dar ina discurrida cul campiun e herox sportiv. El biro da siu management a Cuera ha el buca repetiu las rispostas ch’el ha dau a tozzels schurnalists digl entir mund. Gl’idol ha dau l’intervesta persunala el lungatg dalla Lumnezia nua ch’el ei carschius si.
FMR: Nino Schurter, ils 21 da settember 2025 a Lai haveis Vus terminau Vossa gronda carriera. Dapi lu ei Vies mintgagi semidaus. Descrivi inaga co ei va en quella nova fasa dalla veta.
Nino Schurter: Tochen ussa sesent’jeu buca sco sch’jeu havess entschiet ina nova fasa dalla veta. La sesiun da cuorsas ei ida a fin e tut mes collegas han era giu pausa. Aschia eis ei iu vinavon sco tochen dacheu.
Co eis ei stau culs termins, suenter il cumiau ufficial?
Atgnamein sco adina suenter la sesiun. Lu hai jeu ina massa termins cun sponsurs, per biketrails e da quei. Cheu ei semidau nuot. Tochen ussa gaudel jeu sulettamein da buca esser pli sut il squetsch da prestaziun sco avon. Malgrad quei sent’jeu plaunsiu ch’jeu stuess entscheiver puspei a trenar pigl onn che vegn. Jeu stoi planisar tut da niev, con bia ch’jeu investeschel pil trenament e con ferm ch’jeu restel focusaus sin sepreparar per las cuorsas vegnentas.
Lu caleis tuttina buca diltut?
Jeu sun buca pli atlet sil pli ault nivel e cuppa mundiala. A certas cuorsas separticipeschel jeu vinavon, ei resta ina part da mia lavur. Per exempel ella nova disciplina «gravelbike». Igl ei cuorsas cun in velo da via che ha rodas pli grossas per carrar sin vias natiralas. En quella disciplina separticipesch’jeu alla cuorsa «Utopia» en Spagna. Lu vi jeu separticipar al «The Rift» ell’Islandia, in renomada cuorsa da gravelbike. Sin miu program ein denton era cuorsas da MTB. Ina da quellas ei il BC Bike Race el Canada. Quella vulev’jeu adina far, erel denton occupaus ella cuppa mundiala. Lu fetsch jeu naturalmein cuorsa liunga. Per la cuorsa da Planoiras sundel jeu s’annunziaus. E lu creigi’jeu ch’jeu s’annunzi aunc pil Maraton engiadines 2026. Jeu gaudel tut quellas cuorsas. Buca pli cul squetsch dad esser top top top. Plitost pigl event e per esser denter la glieud.
Co ei Vies gi structuraus ussa, sco atlet «normal» e buca pli dil pli ault livel?
Jeu emprovel aunc adina da trenar silmeins ina gada a gi. Pli baul fagevel jeu duas gadas a gi sport. Dasperas hai jeu en miu program ina massa differentas caussas. Bia sundel jeu vid il computer cun organisar, planisar e contactar glieud ed instituziuns. Jeu hai era surpriu entgins jobs dasperas. In da quels ei GOATrails che planisescha e baghegia trutgs da mountainbike. In’autra part da mia lavur ei quella dad «influencer». Tut mes partenaris vulan ch’jeu presenti, sin mes canals ed ellas medias socialas, ils products, mes velos, las parts da quel e gl’equipadi. Jeu gaudel ussa fetg d’esser independents e da saver decider sez tgei ch’jeu vi e tgei buc. Jeu hai circa diesch contracts e partenadis cun firmas ni organisaziuns.
Eis ei mai stau per Vus in’opziun da surprender in post da trenader ni coach, ni dad ir ella promoziun dalla giuventetgna?
Jeu hai adina fetg grond tschaffen da far zatgei cun affons. Sco trenader hai jeu denton mai viu memez. Mia feglia che ha ussa diesch onns fa part dil club da velos da Cuera ed jeu accumpognel mintgaton ella. Encuretg in post en quella direcziun hai jeu mai. Mo tgisà, forsa semida quei.
Seregurdeis aunc cu Vus haveis absolviu, sco buob, l’emprema cuorsa?
Gie, quei ei stau 1994, la cuorsa dil kilometer a Schluein. Miu frar ed jeu havein vuliu separticipar. Nus havevan negins velos enta Tersnaus ed aschia han nos geniturs stuiu prender si per mintgin in. Sep Casutt haveva lu la fatschenta da velos a Glion. Naven dall’entschatta ha quei sport plaschiu fetg. Ellas categorias da nossas annadas havein nus gudignau omisdus la cuorsa dil kilometer. Quei ha naturalmein motivau e sin quei essan nus sedecidi d’entrar el Club da velo Surselva. En quel han ils trenaders adina motivau e promoviu nus. Jeu havevel sentiu ch’jeu hagi in cert talent pil mountainbike. Cullas cuorsas che nus mavan lu ha mia carriera entschiet.
Oz, bien 30 onns pli tard, ei il sport da MTB sesviluppaus. Veseis Vus differenzas tier 1994?
Bia ei semidau, cunzun il material. Cun in mountainbike dad oz san ins far tut autras caussas. Las cuorsas ed ils percuors ein semidadai fetg. Ins va denton aunc adina cun velo per esser ora ella natira e per guder quella. Il sentiment da libertad, da saver seser sil velo e semplamein ir nua ch’ins vul, ei restaus.
Il squetsch per atletas ed atlets ambizius ei denton s’augmentaus, ni buc?
Quei dependa co ins pren ei, e co ins sa ir entuorn cun squetsch. Per giuvnas e giuvens che vulan daventar profis eis ei ina pulita scola dalla veta. La concentraziun da glieud che vul ir quella via ei segiramein carschida. Morder sto aunc adina finadina e finadin.
Percuors da MTB pretendan ina buna infrastructura. Vus planiseis ussa era trails. Ei quei sectur ina da Vossas finamiras principalas?
Gie, pil futur ves’jeu quei sco ina da mias grondas lavurs. Nus essan aunc vid baghegiar si ed aquirir projects per trails.
Oz investeschan las regiuns bia pil traffic plaun. Ei il prighel buca gronds che bikers e viandonts concurrenzeschien in l’auter?
Dapertut nua ch’ei ha ina massa glieud sa ei dar discrepanzas. Ei sto denton buca esser ina concurrenza. Sch’ei dat conflicts, ston ins exnum reagir e sligiar quels. Tut tgi che semova ella natira duei haver plascher, negin duei ir in l’auter silla gnarva. En loghens nua ch’il traffic plaun secruscha drova ei il respect vicendeivel. Las regiuns turisticas vulan explicitamein promover omisdus, bikers e viandonts. Ellas ston perquei, leu nua ch’ei dat concentraziuns, zavrar rutas e scaffir pusseivladads per omisduas gruppas d’interess. Denton mo sch’il squetsch ei memia gronds ei quei necessari. El cantun Grischun funcziuna ei per gronda part fetg bein cun prender risguard e cun separar rutas. Ils biars san che la natira porscha plaz a tuts. Nuorsas neras dat ei deplorablamein ton tiels bikers sco tiels viandonts.
Nino Schurter para dad esser in niev ambassadur da fairness e respect?
Gie, quei vi jeu schon esser. Sche nus vulein mantener quella buna convivenza, sai jeu mo ir ordavon cul bien exempel. Sco mountainbiker sai jeu ch’jeu stos ir pli plaun nua ch’jeu partgel il trutg culs viandonts. In salid curteseivel sto esser. S’entupar cun respect ei mia devisa, lu ha ei plaz per tuts.
Tonscha ei mintgaton per ina viseta a Tersnaus, el vitg nua che Vus haveis passentau l’affonza?
Gie, clar, mes geniturs stattan aunc adina leu. Bia astgein nus ir aa tscheina e guder la cuschina dalla mumma. Mia feglia Lisa va fetg bugen tier la tatta e nus essan adina puspei en Lumnezia. Sper la fontauna che la vischnaunca ha dedicau a mi a Tersnaus astg’jeu ussa aunc metter in secund object, numnadamein il baun che la regenza grischuna ha regalau a mi per la fin da mia carriera.
Gust da leger dapli?