Seras d’informaziun davart workshops d’innovaziun

Il Program San Gottardo (PSG) promova ideas e projects d’interpresas, vischnauncas e persunas engaschadas en Surselva, cantun Uri e la regiun Blinzuna e Valli. El vegn purtaus dils cantuns Uri, Grischun e Tessin e ha l’incumbensa da rinforzar las treis regiuns sco loghens attractivs da viver, da luvrar e da cultura. Sco l’instituziun scriva en ina communicaziun als mieds da massa, giogan innovaziun, collaboraziun e nez responsabel dallas resursas naturalas ina rolla centrala.

Seras d’informaziun

Las treis regiuns ein rehas da lenna, crappa, aua, cuntrada e biodiversitad. «Quellas resursas duein buca mo vegnir protegidas, mobein era esser la basa per projects prudents ed orientai al futur», scriva il Program San Gottardo. L’auter onn ein quellas resursas il tema da workshops. Per rimnar ideas per quels organisescha el il december treis seras d’orientaziun a Glion, Altdorf e Biasca. Quellas treis seras d’informaziun ed allura ils workshops sedrezzan a persunas engaschadas, interpresas, representantas e representants dil maun public, sco era persunalitads che vulan formar activamein il territori dil Gottard.

Workshops d’ideas

Dil fevrer entochen il settember 2026 duein quellas ideas vegnir sviluppadas communablamein cun accumpignament professiunal. La finamira ei projects che pon allura vegnir concretisai e susteni. Quei project d’ideas «Resursas naturalas» vegn menaus e moderaus dalla Scol’aulta professiunala Grischun sin incarica dil PSG. Pusseivla ei era ina participaziun online. Sco il PSG scriva, ei ina participaziun el liug denton pli adattada pil brat d’ideas cun expertas ed experts. «Tgi che vul formar activamein la regiun anfla inspiraziun, brat da savida e sustegn dallas atgnas ideas allas seras d’informaziun ed ils workshops», scriva il PSG. La regiun dil Program San Gottard sestenda da Laax entochen Flüelen e Cadenazzo.